Hlutabréfaverð fasteignafélagsins Reita hefur hækkað um 3% í um 400 milljón króna viðskiptum í morgun en félagið birti árshlutauppgjöreftir lokun markaða í gær.
Í uppgjörinu kom fram að fasteignafélagið hefði fjárfest fyrir um 17 milljarða króna það sem af er ári.
Það er „vel umfram“ markmiði félagsins um fjárfestingar upp á 11 milljarða króna fyrir árið 2024.
Reitir tóku fram að mikill árangur hafi verið í arðsömum fasteignakaupum sem endurspeglast í að félagið hafi fest kaup á nýjum fasteignum fyrir um 9 milljarða króna á tímabilinu. Arðsemi fasteignakaupanna er metin á a.m.k. 6,7%.
Hlutabréfaverð Reita stendur í 103 krónum um þessar mundir en hefur ekki verið hærra í rúm tvö ár. Gengi félagsins fór hæst í 109 krónur árið 2017.
Gengi félagsins hefur hækkað um 25% á árinu og um 39% síðastliðið ár.
