Hlutabréfaverð Símans hefur hækkað um rúm 3% í tæplega 400 milljón króna viðskiptum það sem af er degi.
Gengi fjarskiptafélagsins hefur nú hækkað um 8% á síðastliðnum tveimur og hálfum viðskiptadögum. Dagslokagengi þriðjudagsins var 12,6 krónur en gengið stendur nú í 13,6 krónum á hlut.
Í morgun var tilkynnt um viðskipti með um 5 milljónir hluta í félaginu á genginu 13,3 krónur á hlut sem samsvarar um 66,5 milljón króna viðskiptum.
Veltan jókst síðan töluvert rétt fyrir hádegi en 11:29 fóru í gegn viðskipti með 4,15 milljón hluti á genginu 13,5 krónur sem samsvarar um 56 milljón króna viðskiptum.
Einnig mínútu síðar fóru í gegn viðskipti með 8 milljón hluti í félaginu á genginu 13,5 sem samsvarar um 108 milljón króna viðskiptum.
Gengið fór síðan í 13,6 krónur á hlut aðeins þremur mínútum síðar er 5 milljón hlutir skiptust um hendur. Samsvarar það um 68 milljón króna viðskiptum.
Til samanburðar er dagleg velta með bréf Símans rúmlega 7 milljón hlutir.
