Hlutabréfaverð þýskra bílaframleiðenda lækkaði í fyrstu viðskiptum í kauphöllinni í Frankfurt í morgun.
Donald Trump var kjörinn forseti Bandaríkjanna í nótt en eitt stærsta kosningaloforð Trump er að setja tolla á innflutning frá Evrópu, Kína og Mexíkó.
Gengi Porsche leiðir lækkanir í DAX-vísitölunni í Þýskalandi er gengi bílaframleiðandans hefur lækkað um 7,4%. Hlutabréfaverð BMW hefur lækkað um 7,2% á meðan gengi Mercedes Benz hefur lækkað um 5,6% og gengi Volkswagen hefur lækkað um 4,8%.
Samkvæmt Bloomberg munu fyrirhugaðir tollar Trump hafa mjög neikvæð áhrif á þýska bílaframleiðendur en Bandaríkjamarkaður er þeirra langstærsti útflutningsmarkaður.
Í kosningabaráttunni lofaði Trump sérstaklega að setja tolla á þýska bílaframleiðendur til að vernda bandarískan iðnað.
„Ég vil að þýskir bílaframleiðendur verði bandarískir bílaframleiðendur,“ sagði Trump í Savannah Georgia í september. „Ég vil sjá þá framleiða bíla sína hér,“ bætti hann við.
Samkvæmt Bloomberg eru langflestir þýskir bílaframleiðendur með verksmiðjur í Bandaríkjunum.
Volkswagen framleiddi um 175 þúsund bíla í Chattanooga, Tennessee í fyrra en samkvæmt uppgjöri félagsins hefur Volkswagen fjárfest um 4,3 milljarða dala í Tennessee frá árinu 2009.
Mercedes Benz framleiðir jepplinga sína fyrir Bandaríkjamarkað í Alabama á meðan BMW er með verksmiðjur í Suður-Karólínu.
