Tveir stærstu hluthafar flugfélagsins Play, Einar Örn Ólafsson, forstjóri Play, og Elías Skúli Skúlason, varaformaður stjórnar Play, hafa gert yfirtökutilboð í allt hlutafé félagsins og stefna á afskráningu félagsins úr Kauphöll Íslands.
Yfirtökutilboðið hljóðar upp á eina krónu á hlut en hluthafar geta valið að fá annaðhvort greitt í formi hlutar í nýju félagi eða reiðufjár. Dagslokagengi Play í dag var 0,81 króna á hlut og er því markaðsvirði félagsins 1,5 milljarðar króna.
Virði félagsins í yfirtökutilboðinu, miðað við 1 krónu á hlut, er tæplega 1,9 milljarðar.
Yfirtökutilboðið verður fjármagnað með að lágmarki 20 milljóna dala fjárframlagi, sem samsvarar um 2,5 milljörðum króna, en af þeirri fjárhæð er þegar skuldbinding fyrir rúmlega þriðjungi fjárhæðarinnar.
Skila inn íslenska flugrekstrarleyfinu
Samkvæmt fréttatilkynningunni frá Play ætla Einar og Skúli að stuðla áfram að samkeppni á íslenskum flugmarkaði, neytendum til góða, undir merkjum Play með því að bjóða hagkvæm flugfargjöld fyrir Íslendinga og ferðamenn.
„Í stuttu máli munu farþegar frá Íslandi ekki finna fyrir breytingum á þjónustu félagsins. Yfirbragð og ásýnd félagsins og flugvéla verða óbreytt. Farþegaþoturnar verða ennþá rauðar, áhafnir verða frá Íslandi og starfa eftir íslenskum kjarasamningum. ,“ segir í tilkynningunni.
Félagið mun áfram einblína á að bjóða upp á framboð til sólarlandastaða frá Íslandi. Flug til Norður-Ameríku verði hins vegar hætt frá og með október 2025.
Borgaráfangastöðum í Norður-Evrópu mun einnig fækka. Flogið verður undir maltnesku flugrekstrarleyfi og íslenska flugrekstrarleyfinu verður skilað.
Fjórar flugvélar munu sinna flugi til og frá Íslandi, einkum til sólarlanda. Hinar sex vélarnar verða leigðar í arðbær verkefni til annarra flugrekenda.
Samkvæmt tilkynningu verður lögð aukin áhersla á skrifstofur félagsins í Möltu og Litháen.
„Hér er fyrst og fremst um að ræða áform um praktískar breytingar á starfsemi íslenska flugfélagsins Play. Með þeim leggjum við áherslu á arðbæra þætti rekstursins, það er sólarlandaflug, og hættum þeim hluta rekstursins sem hefur ekki skilað árangri. Við hlökkum til að halda áfram að stuðla að samkeppni á flugmarkaði í rauðu vélunum, með íslenskum áhöfnum. Meginmarkmið okkar er nú sem fyrr að bjóða Íslendingum hagkvæm flugfarfargjöld í sólina,“ segir Einar Örn Ólafsson, fjárfestir og forstjóri Play í tilkynningunni.
Einar og Skúli með 19% hlut
Félög tengd Einari Erni, Leika fjárfestingar ehf., Einir ehf. og Gnitanes ehf. eru samanlagt stærsti hluthafi Play með 10,83% hlut.
Birta lífeyrissjóður er stærsti einstaki hluthafinn í flugfélaginu með 10,35% hlut. Lífeyrissjóðurinn á rúmlega 195 milljón hluti.
Fea ehf., sem er alfarið í eigu Skúla Skúlasonar, er næststærsti einstaki hluthafi Play með 124,9 milljónir hluta, eða um 6,6%.
Skúli á einnig 26,13% hlut í Rea ehf., sem fer með 1,76% hlut í Play. Þessi tvö félög tengd Skúla fara því með um 8,36% hluti í Play en Skúli hefur einnig keypt bréf í eigin nafni.
Markaðsvirði Play miðað við dagslokagengi föstudagsins var 1,5 milljarðar króna. Sé tekið mið af tilboðsgenginu er virði félagsins tæpir 1,9 milljarðar króna.
Áskoranir í rekstri Play
Play tapaði 66 milljónum dala á liðnu ári, sem nemur ríflega 9,1 milljarði króna. Til samanburðar tapaði félagið um 35 milljónum dala árið áður, sem nemur 4,8 milljörðum króna. Hefur félagið í heildina tapað 171,4 milljónum dala frá stofnun þess, sem nemur 23,3 milljörðum króna.
Tekjuvöxtur félagsins hefur þó verið mikill í takt við aukin umsvif. Tekjur Play á síðasta ári námu 292 milljónum dala, sem nemur 40,3 milljörðum króna. Tekjurnar jukust um 3,7% milli ára en hafa meira en tvöfaldast frá fyrsta heila starfsári flugfélagsins árið 2022.
Rúmlega 1,6 milljónir farþega flugu með félaginu á árinu 2024 og nemur tap félagsins af hverjum farþega 5.525 krónum.
Heildartap Play á árinu var tvöfalt hærra en rekstrartapið (EBIT), m.a. vegna niðurfærslu á yfirfæranlegu skattalegu tapi upp á 24,1 milljón dala. Þannig nam rekstrartap Play af hverjum farþega 2.556 krónum.
Hans Jørgen Elnæs, norskur greinandi og ráðgjafi á flugmarkaði, sagði í samtali við Viðskiptablaðið í vor að helsta áskorun Play sé að einingakostnaður (CASK) sé enn þá talsvert meiri en einingatekjur (RASK). Þetta þyrfti að breytast í ár til að félagið skili hagnaði eða a.m.k. minnki tapið milli ára.
Einingatekjur Play lækkuðu á milli ára, voru 4,9 Bandaríkjasent, borið saman við 5 sent árið 2023. Einingakostnaður á árinu 2024 var 5,6 Bandaríkjasent og stóð í stað frá fyrra ári.
Þá jókst einingakostnaður án eldsneytis milli ára, var 4 sent samanborið við 3,8 sent árið á undan.
Í fréttatilkynningu sem fylgdi ársreikningi Play segir m.a. að stefnt sé að því að skila 15-20% hagræðingu í yfirbyggingu á yfirstandandi ári.
Play tapaði 26,8 milljónum dala á fyrsta ársfjórðungi, eða sem nemur 3,7 milljörðum króna miðað við meðalgengi krónunnar á tímabilinu. Til samanburðar tapaði flugfélagið 27,2 milljónum dala á sama tímabili í fyrra.
Tekjur Play á fjórðungnum námu 46,4 milljónum dala, eða um 6,4 milljörðum króna, samanborið við 54,4 milljónir dala á sama tímabili í fyrra. Samdráttinn má rekja til þess að dregið var úr framboði og flugáætlun löguð betur að árstíðabundinni eftirspurn.
Tekjur á hvern framboðinn sætiskílómetra (RASK) á fyrsta ársfjórðungi 2025 voru 4,10 sent, samanborið við 4,24 sent á sama tíma 2024. Meðaltekjur á hvern farþega hækkuðu um 1,2%.
Handbært fé Play jókst á milli ára, úr 17,2 milljónum dala í lok mars 2024 í 21,1 milljón dala í lok fyrsta ársfjórðungs þessa árs.
„Lausafjárstaðan er sterkari samanborið við fyrra ár, sem endurspeglar betri rekstrarhorfur. Félagið leitar ávallt leiða til að tryggja lausafjárstöðu félagsins sem best, meðal annars með hagræðingu á veltufé en ef markaðsaðstæður breytast kemur til greina að auka hlutafé í félaginu eða dótturfélagi þess,“ sagði í uppgjörstilkynningu félagsins.
Eignir Play námu 363 milljónum dala, eða tæplega 48 milljörðum króna, í lok mars sl. Eigið fé flugfélagsins var neikvætt um 60,4 milljónir dala eða um 8 milljarða króna.
