Herdís Dröfn Fjeldsted hefur verið ráðin forstjóri Sýnar að loknu ráðningarferli. Hún mun hefja störf þann 11. janúar.
Í Kauphallartilkynningu segir að Herdís hafi víðtæka reynslu úr atvinnulífinu sem stjórnandi en hún er fyrrverandi forstjóri Valitor og leiddi hún félagið gegnum endurskipulagningu og síðar sölu.
„Herdís var áður framkvæmdastjóri Framtakssjóðs Íslands, og hefur setið í fjölda stjórna hjá bæði skráðum og óskráðum félögum hérlendis og erlendis, svo sem Arion banka, Icelandair Group, Icelandic Group og Promens. Þá er Herdís stjórnarformaður Eyris Venture Management,“ segir í Kauphallartilkynningu.
„Ég er þakklát fyrir það traust sem mér er sýnt og er full eftirvæntingar að taka við keflinu hjá Sýn. Ég hlakka til að kynnast starfseminni, starfsfólkinu og viðskiptavinum félagsins. Sýn samanstendur af spennandi rekstrareiningum í fjarskiptum, fjölmiðlum og í upplýsingatækni, og það verður spennandi að taka þátt í því með stjórn og starfsmönnum að efla þær einingar enn frekar og hámarka virði þeirra,“ segir Herdís Dröfn Fjeldsted, forstjóri Sýnar:
„Herdís hefur sýnt að hún er framúrskarandi stjórnandi sem hefur jákvæð áhrif á rekstur og afkomu þeirra félaga sem hún lætur sig varða. Við erum að fá einstaklega öfluga manneskju í starfið og hlökkum til samstarfsins. Á þessum tímamótum viljum við jafnframt þakka Páli Ásgrímssyni – sem gegnt hefur starfi forstjóra tímabundið – sérstaklega fyrir sitt framlag en hann hverfur nú aftur til starfa sem framkvæmdastjóri lögfræðisviðs Sýnar,” segir Jón Skaftason, stjórnarformaður Sýnar.
