Hildur Sverrisdóttir, þingflokksformaður Sjálfstæðisflokksins, hefur birt færslu á Facebook þar sem hún segir að sér þyki leitt að hafa ollið uppnámi með því að slíta þingi í hlutverki varaforseta rétt fyrir miðnætti í gærkvöldi.
„Mér þykir innilega leiðinlegt að fundarstjórn mín sem varaforseti í gærkvöldi sé túlkuð sem tilraun til valdaráns eða hvað það er sem ég heyri víða þennan morguninn. Í stuttu màli var það að sjálfsögðu alls ekki ætlun mín,“ segir Hildur.
Hún vísar þar í orð Guðmundar Inga Kristinssonar, mennta- og barnamálaráðherra, sem lýsti ákvörðun Hildar sem „valdaráni“ í umræðum á þinginu í morgun.
„Fyrir áhugasama um þetta fyrirkomulag þá eru langir þingfundir almennt til miðnættis. Varaforseti á ekki að gefa ræðumanni orðið heldur slíta fundi þegar fullur ræðutími hans með andsvörum myndi ekki nást fyrir þann tíma.
Forsætisnefnd hefur ekki verið kölluð saman í vikunni og forseti hefur ekki haft samráð við varaforseta um lengd þingfunda. Hvorki forseti né nokkur annar hafði tjáð mér í gær að til stæði að halda fund lengur en til miðnættis. Því taldi ég mig vera að fylgja réttu fyrirkomulagi með því að slíta fundi í stað þess að gefa ræðumanni orðið sem hefði verið lengra en til miðnættis. Ég sumsé taldi mig vera að fylgja venjum þar sem næturfundir eru algjör undantekning og ég var ekki með neinar upplýsingar eða fyrirmæli forseta um annað.
En ég hefði eftir á að hyggja að spyrjast fyrir í ljósi aðstæðna og þykir leitt að hafa ollið öllu þessu uppnámi.“
Hildur svarar einnig fyrir ásakanir um að Bergþór Ólason, þingflokksformaður Miðflokksins, hafi rétt sér blað með fyrirmælum um að slíta þingfundinum. Hún segir að á því blaði hafi verið dagskrártillaga stjórnarandstöðunnar um óundirbúnar fyrirspurnir svo stjórnarandstaðan gæti sinnt eftirlitshlutverki sínu.
„Ég ótrúlegt en satt tek ekki við fyrirmælum frá Bergþóri Ólasyni, eins ágætur og hann er, heldur tek mínar ákvarðanir sjálf - sem eru svo misfarsælar eins og gengur.“
