Hlutabréfaverð Sýnar hefur lækkað um rúm 6% í fyrstu viðskiptum eftir að félagið sendi frá sér neikvæða afkomuviðvörun eftir lokun markaða í gær.
Sýn ákvað að gjaldfæra einskiptisliði upp á um 840 milljónir króna á árinu 2023 og segir í afkomuviðvörun að þetta muni hafa afgerandi áhrif á afkomu ársins í ársuppgjöri félagsins.
Samkvæmt uppgjörsdrögum Sýnar var EBIT-afkoma ársins 2023 um 1.108 milljónir króna án hagnaðar vegna sölu á stofnneti upp á 2.436 milljónir. Leiðrétt fyrir einskiptisliðum er rekstrarafkoma félagsins á árinu 2023 um 1.948 milljónir.
Dagslokagengi Sýnar 47 krónur í gær en stendur í 44 krónum þegar þetta er skrifað.
Samhliða því lækkuðu hlutabréf Eimskips um rúm 5% í fyrstu viðskiptum dagsins en gengi Eimskips hefur lækkað um 13% síðastliðinn mánuð.
Skipafélagið birti ársuppgjör eftir lokun markaða í gær en hagnaður félagsins á fjórða ársfjórðungi dróst saman um 61% á milli ára vegna krefjandi markaðsaðstæðna.
Gengi Eimskips var í 462 krónum í byrjun mánaðar en stendur í 402 krónum þegar þetta er skrifað.
