HS Orka hf. hefur samið við Kjöl fjárfestingarfélag ehf. um kaup á félaginu Íslensk Orkuvirkjun Seyðisfirði ehf. Félagið á og rekur tvær vatnsaflsvirkjanir í Fjarðará í Seyðisfirði og er uppsett afl þeirra samtals 9.8 MW, samkvæmt fréttatilkynningu frá HS Orku.
„Kaupin tryggja HS Orku og viðskiptavinum fyrirtækisins á almennum markaði aðgang að raforku á álagstoppum. Afhending félagsins fór fram í gær, 31. ágúst 2023 og eru kaupin að stærstum hluta fjármögnuð með eiginfjárframlagi hluthafa HS Orku,“ segir í fréttatilkynningu.
HS Orka þekkir rekstur Fjarðarárvirkjana vel en fyrirtækið hefur keypt alla orku og stýrt framleiðslu frá virkjununum frá því að hún hófst árið 2009. Virkjanirnar í Fjarðará eru Bjólfsvirkjun og Gúlsvirkjun.
Orkusala til almennra notenda
Í tilkynningu segir að góð miðlunarlón eru í Heiðarvatni og Þverárlóni á Fjarðarheiði. Miðlun úr þeim gerir HS Orku kleift að nýta framleiðslu virkjananna til að mæta álagstoppum almennra notenda að vetrarlagi.
Framleiðsla virkjananna er fyrst og fremst hugsuð sem liður í orkusölu til almennra notenda.
Fagnaðarefni að með kaupunum hefur HS Orka nú fært út kvíarnar í nýjan landshluta
Tómas Már Sigurðsson, forstjóri HS Orku, segir Fjarðarárvirkjanir falla einkar vel að rekstri og annarri raforkuframleiðslu fyrirtækisins.
„Virkjanirnar gera okkur kleift að þjóna enn betur viðskiptavinum okkar á hinum almenna markaði. Við þekkjum þessar virkjanir vel og höfum átt afar farsælt samstarf við fyrri eigendur. Það er einnig fagnaðarefni að með kaupunum hefur HS Orka nú fært út kvíarnar í nýjan landshluta og er fyrirtækinu í mun að falla vel að samfélaginu fyrir austan,“ segir Tómas Már í fréttatilkynningu.
