Isavia ohf. og Norræni fjárfestingarbankann (NIB) undirrituðu í dag samning um lán til tíu ára að fjárhæð 50 milljóna evra, eða sem nemur jafnvirði um 7,5 milljörðum íslenskra króna. Þetta kemur fram í fréttatilkynningu frá Isavia.
Um er að ræða lán vegna framkvæmda á Keflavíkurflugvelli, sér í lagi við austurálmu flugstöðvarinnar.
Um er að ræða 23 þúsund fermetra viðbyggingu við núverandi flugstöð sem er um 30% stækkun.
Isavia gerir ráð fyrir að framkvæmdin fái framúrskarandi einkunn á grundvelli BREEAM-vottunarkerfisins. Hluta byggingarinnar verður tekin í notkun fyrir lok árs 2023 en hú verður tekin í notkun að fullu lokið árið 2024.
Sveinbjörn Indriðason, forstjóri Isavia, segir í tilkynningu að félagið hafi sett sér metnaðarfull en um leið afmörkuð og skýr markmið í umhverfismálum og fylgi ítarlegri aðgerðaráætlun til að koma sjálfbærnistefnu Isavia í framkvæmd.
„Uppbyggingin er vottuð með BREEAM sem er óháð vottun sem tryggir mikilvægt aðhald og að sjálfbærni verði höfð að leiðarljósi í framkvæmdunum. Stefnt er að því að minnka kolefnisspor framkvæmda, minnka vatns- og rafmagnsnotkun og viðhalda grænum svæðum og líffræðilegum fjölbreytileika í hönnun og framkvæmd.“
Sveinbjörn segir mikilvægt að fá NIB að borðinu þar sem mörg verkefni séu fram undan í framkvæmdunum.
„Við erum að bæta við flugstöðvarbygginguna og framkvæma á akstursbrautum – allt til að bæta þjónustuna við notendur Keflavíkurflugvallar.“
André Küüsvek, forstjóri og stjórnarformaður NIB, segir í tilkynningu Isavia að lánssamningurinn sýni fram á mikilvægi langtíma fjárfestingar í fluggeiranum til að styðja við efnahagsvöxt og flugtengingar.
„Keflavíkurflugvöllur er mikilvæg tengistöð fyrir ferðaþjónustu á Íslandi og þess er vænst að hún leiki mikilvægt hlutverk í efnahag landsins,” segir Küüsvek.
Norræni fjárfestingarbankinn er alþjóðleg fjármálastofnun í eigu aðildarlandanna átta: Danmerkur, Eistlands, Finnlands, Íslands, Lettlands, Litáens, Noregs og Svíþjóðar. Bankinn lánar til opinberra verkefna og einkaverkefna jafnt innan sem utan aðildarríkjanna.
