Samtök atvinnulífsins hafa kallað eftir því að íslensk stjórnvöld hafi skýra og markvissa stefnu í samskiptum við Evrópusambandið næstu árin til að tryggja stöðu íslensks atvinnulífs í samkeppni og nýta ávinning af innri markaði ESB.
Þetta kemur fram í umsögn SA um drög að forgangslista við hagsmunagæslu Íslands gagnvart ESB fyrir árin 2024-2029.
Á heimasíðu SA segir að í sameiginlegri umsögn SA, SAF, SFF, SFS og SVÞ er aðild Íslands að EES-samningnum sögð hornsteinn íslenskrar utanríkis- og efnahagsstefnu. Aðildin hafi skilað atvinnulífinu miklum ávinningi, meðal annars með aðgangi að innri markaði ESB.
Samtökin vara þó við því að EES-samningurinn kalli á stöðuga hagsmunagæslu þar sem ný löggjöf ESB geti haft mikil áhrif á starfsskilyrði fyrirtækja hér á landi. Töf á upptöku geti til dæmis skapað óvissu, aukið flækjustig og skert samkeppnishæfni íslenskra fyrirtækja.
„Það getur ekki staðist að íslensk fyrirtæki verði fyrir samkeppnishalla vegna seinagangs í stjórnsýslu eða óvissu um hvaða reglur gilda á markaði,“ segir í umsögn SA.
SA leggja áherslu á að stjórnvöld taki virkan þátt í mótun innri markaðar ESB og verji hagsmuni Íslands í væntanlegum breytingum á EES-samningnum eða öðrum samstarfsformum.
Sérstök áhersla er þá lögð á að Ísland komi að mótun nýrra reglna um sjálfbærniskýrslugerð og upplýsingaskyldu fyrirtækja um kolefnisspor og samfélagslega ábyrgð.
„Við verðum að tryggja að íslensk sjónarmið heyrist áður en ákvarðanir eru teknar sem hafa áhrif á íslenskt atvinnulíf,“ segir SA og hvetja til góðrar samvinnu stjórnvalda og atvinnulífsins í þeirri vinnu.
