Kínverska samkeppniseftirlitið rannsakar nú fyrirhugaða sölu á tveimur höfnum við Panamaskurðinn til bandaríska fyrirtækisins BlackRock. Eftirlitið er sagt vera að tefja undirritun samningsins sem átti að vera undirritaður í gær.
Hafnirnar tvær, Balboa og Cristóbal, eru í eigu kínverska fyrirtækisins Hutchison Port Holdings sem er dótturfélag CK Hutchison Holdings, samsteypufélags í Hong Kong.
Samkeppniseftirlitið í Kína hefur hins vegar sent formlegt svar til ríkisrekna fréttablaðsins Ta Kung Pao og segist vera að rannsaka söluna í samræmi við lög til að vernda sanngjarna samkeppni á markaðnum og gæta hagsmuna almennings.
Eftirlitsaðilar höfðu þegar sent frá sér svipaða yfirlýsingu en í kjölfar þessarar tilkynningar hefur CK Hutchinson ákveðið að undirrita ekki samninginn í þessari viku. Sala hafnanna var dagsett 2. apríl og nam salan rúmlega 23 milljörðum dala.
