Samkvæmt The Wall Street Journal er læknastéttin í Bandaríkjunum klofin um eðli starfsins um þessar mundir.
Læknar eru sagðir vera að rökræða sín á milli um hvort það að vera læknir sé venjulegt starf með hefðbundnum vinnutíma eða köllun þar sem færðar eru fórnir í þágu samfélagsins.
Samkvæmt WSJ hefur svarið fram að þessu verið skýrt en læknar hafa sætt sig við langa vinnudaga og fært miklar fórnir í þágu sjúklinga. Þeir gerðu þetta vitandi að kollegar þeirra væru að gera slíkt hið sama.
Ný kynslóð lækna lítur á starfið öðrum augum og hefur verið að efast um þessa áratugalöngu vinnustaðamenningu.
Dr. Jefferson Vaughan, sem er 63 ára skurðlæknir hjá Jupiter Medical Center í Flórída, segir í samtali við WSJ að hann og aðrir læknar á hans aldri séu að sinna fleiri aukavöktum á bráðamóttökunni en yngri læknar.
Hann segist vera á bakvakt á bráðamóttökunni fimm til sjö kvöld á mánuði líkt og aðrir skurðlæknar á hans aldri á meðan yngri kollegar þeirra taka engar slíkar vaktir og vilja einblína á sérhæfðari skurðaðgerðir.
„Þetta eru bara við gömlu karlarnir sem erum á bakvakt á bráðamóttökunni meðan þrítugir læknar eru heima á hverju kvöldi,“ segir Vaughan og bætir við að þessi þróun hugnist eldri læknum afar illa.
Samkvæmt bandarísku læknasamtökunum (AMA) segjast um helmingur allra lækna finna fyrir einhvers konar kulnun í starfi.
Yngri læknar í Bandaríkjunum hafa verið að kalla eftir fyrirsjáanlegri vinnutíma en þeir segja að ójafnvægi heimilislífs og starfsins sé óþarfi.
Dr. Kara- Grace Leventhal, 40 ára læknir sem vinnur á spítala með föstum vöxtum, segir marga lækna á hennar aldri eiga ung börn sem þurfi einnig að sinna samhliða vinnu.
„Við þurfum að hugsa fyrst um okkur sjálf áður en við getum hugsað um aðra,“ segir Leventhal.
Heilbrigðiskerfið í Bandaríkjunum hefur breyst töluvert á síðustu árum og starfa nú fleiri læknar en áður á spítölum eða stórum heilbrigðisstofnunum en í einkarekstri.
Aukin pappírsvinna og aðrar kröfur yfirvalda hafa aukið stress meðal lækna og segja þeir að starfið sé mun minna gefandi en áður.
Meðallaun um fjórar milljónir á mánuði
Samkvæmt AMA er meðalvinnuvika læknis 59 klukkutímar og meðallaun þeirra eru um 350 þúsund dalir á ári. Samsvarar það um 47 milljónum króna í árslaun eða um 3,9 milljónum á mánuði.
Hægt er að lesa meira um málið hér.
