Kortavelta innlendra greiðslukorta nam tæpum 104 milljörðum króna í janúarmánuði sem er 3% aukning í krónum talið frá sama mánuði í fyrra.
Hins vegar ef leiðrétt er fyrir þróun verðlags og gengis krónu skrapp kortavelta heimila hins vegar saman um 1,1% á milli ára í janúar, samkvæmt greiningardeild Íslandsbanka.
„Þessi þróun hefur verið gegnumgangandi frá apríl síðastliðnum og lýsir vel kólnun í innlendu eftirspurninni hvað heimilin varðar,“ segir í greiningu bankans.
Kortavelta Íslendinga erlendis jókst um nær 4% að raunvirði á sama tímabili en janúarmánuður var annar mánuðurinn í röð þar sem kortavelta erlendis jókst en fram að því hafði hún dregist saman sex mánuði í röð.
„Þrátt fyrir aukningu í kortaveltu erlendis voru færri Íslendingar á faraldsfæti í janúar en á sama tíma fyrir ári. Alls fóru 39 þúsund Íslendingar um Keflavíkurflugvöll í janúarmánuði en árið 2023 var fjöldinn í janúar ríflega 41 þúsund, sem gerir 11% fækkun á milli ára. Það sem gæti skýrt þessa aukningu er til að mynda erlend netverslun sem gæti hafa aukist síðustu tvo mánuði. Einnig gæti verið að styrking krónu að undanförnu hafi hleypt lífi í neyslu Íslendinga erlendis,“ segir í greiningu bankans.
Viðsnúningur var í þróun einkaneyslu á síðasta ári eftir hraðan vöxt árin tvö á undan.
Einkaneysla jókst um 2,5% á fyrri helmingi ársins en dróst saman á þriðja fjórðungi
„Við teljum líklegt að einkaneyslan hafi einnig dregist saman á lokafjórðungi ársins og benda kortaveltutölur fyrir þann fjórðung til þess. Við áætlum að einkaneysluvöxtur hafi verið 0,7% á síðasta ári,“ segir í greiningu bankans en Hagstofan birtir þjóðhagsreikninga fyrir allt árið 2023 í lok mánaðarins.
