Kaupfélag Skagfirðinga er að kaupa B. Jensen sem rekur sláturhús, kjötvinnslu og verslun við Lónsbakka, við Hörgársveit og Akureyri.
Samkvæmt Akureyri.neteru samningar langt komnir og vænta má að kaupin gangi í gegn á næstu vikum.
B. Jensen var stofnað árið 1968 af hjónunum Benny Albert Jensen og Jónínu Sigurbjörgu Guðjónsdóttir. Í dag er félagið í eigu Eriks, sonar þeirra hjóna, og eiginkonu hans, Ingibjargar Stellu Bjarnadóttur en þau áttu fyrirtækið ásamt börnum sínum.
Um 660 milljóna velta í fyrra
Samkvæmt síðasta ársreikningi velti félagið 660 milljónum króna og skilaði 18 milljón króna hagnaði. Eignir félagsins voru bókfærðar á 313 milljónir. Í árslok 2023 námu skuldir félagsins 262 milljónum en þar af voru 117 milljónir skammtímaskuldir.
„Ég get staðfest að það eru alvarlegar viðræður í gangi milli KS og eigenda B.Jensen um kaup hins fyrrnefnda á hinu síðarnefnda. Samningar liggja í raun fyrir en það er verið að hnýta lausa enda og gert er ráð fyrir að viðskiptin klárist á næstu 2-3 vikum,“ segir Ágúst Torfi Hauksson, framkvæmdastjóri Kjarnafæðis-Norðlenska, við Akureyri.net.
En Kaupfélag Skagfirðinga keypti allt hlutafé Kjarnafæðis/Norðlenska í sumar.
Ágúst Torfi bætir við að með kaupunum verði bæði stórgripasláturhúsin í Eyjafirði á sömu hendi en markmiðið með viðskiptunum sé að auka hagkvæmni og ná fram hagræðingu í greininni.
„Viðskiptin eru ekki endanlega um garð gengin og ótímabært að tjá sig í smáatriðum um hvernig málum verði fyrir komið í framhaldinu enda talsverð vinna fram undan við könnun valkosta og fleira,“ segir Ágúst Torfi. „Það eru spennandi tímar fram undan og kaupin á B.Jensen eru mikilvægt skref í átt að frekari hagræðingu í greininni,“ segir Ágúst Torfi við Akureyri.net.
