Landsvirkjun gaf í dag út græn skuldabréf á bandarískum skuldabréfamarkaði (e. US Private Placement), að fjárhæð 150 milljónir dala eða sem samsvarar um 19,4 milljörðum íslenskra króna.
Fjármagnið verður nýtt við virkjanaframkvæmdir Landsvirkjunar, þar á meðal framkvæmdir við Vaðölduver og Hvammsvirkjun.
Vaðölduver verður fyrsta vindorkuver landsins með 28 vindmyllum. Gert er ráð fyrir að fyrri 14 vindmyllurnar verði gangsettar haustið 2026 og að Vaðölduver verði komið í fullan rekstur fyrir lok árs 2027. Hvammsvirkjun verður áttunda vatnsaflsstöðin á Þjórsár- og Tungnaársvæðinu.
Stækkuðu útboðið
Landsvirkjun segir í tilkynningu að upphaflega hafi verið stefnt að útgáfu að fjárhæð 125 milljónir dala en mikill áhugi fjárfesta hafi leitt til þess að útboðið var stækkað og lauk í 150 milljónum dala.
Skuldabréfin eru á gjalddaga eftir 6 og 8 ár og voru gefin út í þremur flokkum. Tveir flokkanna bera fasta vexti, 5,17% og 5,37%, sem jafngildir 115-125 punkta álagi á bandarísk ríkisskuldabréf. Þriðji flokkurinn ber fljótandi vexti sem miðast við SOFR-vexti með 144 punkta álagi.
„Um er að ræða skuldabréfaútgáfu án fjárhagslegra skilyrða (e. covenants), sem endurspeglar traust fjárfesta á fjárhagslegri stöðu Landsvirkjunar.“
Barclays Capital Inc. og ING Financial Markets LLC voru umsjónaraðilar útgáfunnar. Útgáfan er græn „og endurspeglar skýrar áherslur Landsvirkjunar á sjálfbærnitengda fjármögnun“.
„Skuldabréfin eru gefin út innan græns fjármögnunarramma Landsvirkjunar sem endurspeglar skuldbindingu fyrirtækisins við sjálfbærni- og loftslagsmál. Grænum fjármögnunarramma fylgir að fjármunirnir verði nýttir til að fjármagna eignir eða verkefni sem hafa jákvæð áhrif á umhverfi og loftslagsmál.“
