Inga Sæland, félags- og húsnæðismálaráðherra, skrifaði færslu á samfélagsmiðlum í gær þar sem hún heldur því fram að sveitarfélög fái „hundruð milljóna í auknar útsvarstekjur“ verði veiðigjaldafrumvarpið samþykkt.
Þetta mun vera alrangt en Inga Sæland nýtir þó tækifærið í sömu færslu til að saka aðra um „fals“ og „hræðsluáróður“
„Í stað þess að gleðjast yfir því að sveitarfélögin fái hundruði milljóna í auknar útsvarstekjur með viðbótar og eðlilegum gjöldum fyrir aðgang að auðlindinni okkar og endurreisn á mölbrotunum innviðum sem við fengum í arf frá fyrri ríkisstjórn nei, ó nei þá hrópa þeir og arga eins og við séum að koma öllu í kalda kol. Ömurlegt að verða vitni að öðru eins," skrifar Inga Sæland.
Í frumvarpi ríkisstjórnarinnar, sem Inga Sæland situr í, kemur þó skýrt fram að þetta sé rangt.
Í kafla 5.1.3 um áhrif frumvarpsins á sveitarfélög segir: „Í frumvarpinu eru því ekki lagðar til breytingar sem hafa bein fjárhagsleg áhrif á tekjustofna eða útgjöld sveitarfélaga.“
Til útskýringar þýðir þetta að útsvarstekjur sveitarfélaganna aukast ekki með samþykkt frumvarpsins eins og Inga Sæland heldur fram.
„Ráðherrann Inga Sæland hefur ekki lesið umdeilt frumvarp sem ríkisstjórnin, sem hún á sjálf sæti í, hefur lagt fram og berst nú fyrir að verði samþykkt sem lög frá Alþingi.
Það sést best á því að ráðherrann hefur nú óvænt blandað sér í opinberar umræður um veiðigjaldafrumvarp ríkisstjórnar sinnar og segir á Facebook-síðu sinni,” skrifar Sigurður Kári Kristjánsson, lögmaður og fyrrum Alþingismaður.
„Hver sem afstaða okkar er til þessa máls þá hljótum við að geta gert þá kröfu til ráðherra í ríkisstjórn Íslands að þeir lesi eigin frumvörp, a.m.k. skilji efni þeirra, áður en þeir ryðjast fram á ritvöllinn með þeim hætti sem Inga Sæland gerði í kvöld,“ skrifaði Sigurður Kári í gærkvöldi.
Hann segir að þetta hljóti allir að sjá og vera sammála um.
„Allt tal um falsfréttastíl í umræðum um þetta mál ætti kannski að skoða í ljósi þessa framlags frá ráðherranum,“ skrifaði Sigurður Kári.
