Vísindanefnd um loftslagsbreytingar hefur skilað Þórunni Sveinbjarnardóttur umhverfisráðherra skýrslu um áhrif loftslagsbreytinga á Íslandi. Niðurstaða vísindanefndarinnar er að áhrifa loftslagsbreytinga gæti þegar í náttúru landsins og að fyrirsjáanlegar loftslagsbreytingar muni einnig hafa veruleg áhrif á náttúrufar hér á landi.
Talið er að fram undir miðja öld muni hlýna um rúmlega 0,2 gráður á áratug á Íslandi. Líklegast er að mest hlýni á veturna en minnst á sumrin. Veðurfarslíkön gera einnig ráð fyrir aukinni úrkomu.
Reiknað er með að íslenskir jöklar hopi ört alla öldina og að Langjökull rýrni hraðast af stóru jöklunum. Ef fram heldur sem horfinn verður hann samkvæmt skýrslunni horfinn með öllu um miðja næstu öld.
Jákvæð áhrif á landbúnað
Fram kemur að hlýnun jarðar sé þegar farin að hafa áhrif á gróðurfar hér á landi, t.d. hafi skógarmörk birkis færst ofar í landið. Þá hafi aðstæður til korn- og skógræktar batnað með hlýnandi loftslagi.
Að mati vísindanefndarinnar hefur hlýnunin að mestu góð áhrif á landbúnað hér á landi. Gera má ráð fyrir aukinni uppskeru á þeim fóður- og matjurtum sem nú eru ræktaðar auk þess sem nýjar nytjategundir verða mögulegar. Loftslagsbreytingum fylgja þó einnig ógnir fyrir landbúnað, einkum gæti ágengni meindýra og plöntusjúkdóma aukist.
Vísindanefndin
Nefndina sem vann skýrsluna skipuðu:
Halldór Björnsson, haf- og veðurfræðingur, formaður.
Árný Erla Sveinbjörnsdóttir, jarðfræðingur, varaformaður.
Anna Kristín Daníelsdóttir, líffræðingur.
Árni Snorrason, vatnafræðingur.
Bjarni D. Sigurðsson, skógfræðingur.
Gísli Viggósson, verkfræðingur.
Jóhann Sigurjónsson, sjávarlíffræðingur.
Snorri Baldursson, líffræðingur.
Sólveig Þorvaldsdóttir, verkfræðingur.
Trausti Jónsson, veðurfræðingur.
Ritari nefndarinnar var Einar Sveinbjörnsson, veðurfræðingur.
Þetta kemur fram á vef Stjórnarráðsins.
