Fyrirtæki hér á landi skiluðu 751 milljarði króna í hagnað í fyrra sem er methagnaður hér á landi. Hagnaðurinn var einnig meiri árið 2021 en hann hafði áður verið og því hægt að tala um mikla búbót í fyrirtækjarekstri á síðustu tveimur árum.

Nokkrir stórir geirar atvinnulífsins skiluðu methagnaði á síðustu tveimur árum og má þar nefna álframleiðslu, fasteignaviðskipti og smásöluverslun.

Arðsemi fyrirtækja í fyrra reyndist góð í sögulegu ljósi og tekjuskattur ríkissjóðs af þessum fyrirtækjum nam 155 milljörðum króna sem er met. Skattgreiðslan í fyrra var meira en helmingi meiri en hún hefur orðið mest áður.