Egg ehf., móðurfélag bílaumboðsins BL, er að kaupa heildverslunina Mítru ehf. sem sérhæfir sig í hjólbörðum og rekstrarvörum fyrir hjólbarðaverkstæði. Skilað hefur verið inn samrunatilkynningu vegna viðskiptanna til Samkeppniseftirlitsins.

Mítra velti 318 milljónum króna á síðasta ári. Heildverslunin, sem er á Tunguhálsi 15, hagnaðist um 11,4 milljónir í fyrra samanborið við 10,9 milljónir árið 2020. Stöðugildi hjá félaginu voru fjögur og launagreiðslur félagsins námu um 46,2 milljónum í fyrra.

Eignir Mítru voru bókfærðar á 199 milljónir í lok síðasta árs, þar af voru birgðir ríflega 145 milljónir. Eigið fé félagsins var 74 milljónir.