Ríkisstjórn Bjarna Benediktssonar tók formlega við völdum í gærkvöldi á ríkisráðsfundi á Bessastöðum. Er þetta í annað sinn sem Bjarni leiðir en hann var síðast forsætisráðherra í nokkra mánuði árið 2017.
Ýmsar breytingar voru gerðar á ráðherraskipan eftir að Katrín Jakobsdóttir ákvað að biðjast lausnar úr embætti forsætisráðherra og fara í forsetaframboð. Alls færðu fjórir ráðherrar sig um sæti og einn nýr kom inn.
Fyrstu lyklaskipti dagsins fóru fram á níunda tímanum þegar Katrín Jakobsdóttir afhenti Bjarna Benediktssyni lyklana að forsætisráðuneytinu.
Næst afhenti Þórdís Kolbrún Reykfjörð Gylfadóttir Sigurði Inga Jóhannssyni lyklana að fjármála- og efnahagsráðuneytinu.
Sigurður Ingi afhenti síðan Svandísi Svavarsdóttur lyklana að innviðaráðuneytinu.
Bjarni afhenti því næst Þórdísi Kolbrúnu lyklana að utanríkisráðuneytinu. Er það í annað sinn sem lyklaskipti fara fram milli Bjarna og Þórdísar á yfirstandandi kjörtímabili en Þórdís og Bjarni skiptust á ráðherrastólum í október síðastliðnum.
Loks fékk Bjarkey Olsen Gunnarsdóttir lyklana að matvælaráðuneytinu afhenta af Svandísi Svavarsdóttur. Bjarkey kemur þar með ný inn en hún var fyrir varaformaður þingflokks Vinstri grænna.
Annað ráðuneyti Bjarna Benediktssonar skipa:
- Bjarni Benediktsson, forsætisráðherra
- Sigurður Ingi Jóhannsson, fjármála- og efnahagsráðherra
- Guðmundur Ingi Guðbrandsson, félags- og vinnumarkaðsráðherra
- Svandís Svavarsdóttir, innviðaráðherra
- Guðlaugur Þór Þórðarson, umhverfis-, orku- og loftslagsráðherra
- Þórdís Kolbrún R. Gylfadóttir, utanríkisráðherra
- Lilja Dögg Alfreðsdóttir, menningar- og viðskiptaráðherra
- Ásmundur Einar Daðason, mennta- og barnamálaráðherra
- Áslaug Arna Sigurbjörnsdóttir, háskóla-, iðnaðar- og nýsköpunarráðherra
- Willum Þór Þórsson, heilbrigðisráðherra
- Guðrún Hafsteinsdóttir, dómsmálaráðherra
- Bjarkey Olsen Gunnarsdóttir, matvælaráðherra
