Félagskonur FKA Framtíðar fylltu salinn í Blush þegar boðið var á Trúnó við varðeldinn með nokkrum ungum konum úr atvinnulífinu. Trúnó við varðeldinn er árlegur viðburður hjá FKA Framtíð þar sem rætt er við vel valdar fyrirmyndir á einlægum nótum.
„Það var einstaklega kósý stemning þetta árið, en viðburðurinn fór fram í fallegri verslun Blush við Dalveg í Kópavogi. Að þessu sinni voru það Gerður Arinbjarnar eigandi Blush, Lína Birgitta eigandi Define the Line og Unnur Aldís markaðsstjóri Smitten sem sátu fyrir svörum við varðeldinn,“ segir í tilkynningu.
Þar var farið yfir áskoranir á ferlinum, framtíðaráform og hvað þær gera til þess að efla sig í lífi og starfi.
Auk trúnósins var boðið upp á veitingar, fordrykk frá Mekka og góðgæti frá Sætum Syndum. Lukkuhjólið vakti mikla lukku þar sem félagskonur gátu unnið verðlaun frá fyrirtækjum sem styrkja félagsstarf FKA Framtíðar eins og Blush, Te & kaffi, Angan skincare, GeoSilica, Salt, S4S, Öskur, Mantra og Stúdíó R57.
FKA segir að á þessu starfsári sé áhersla lögð á að styrkja konur á öllum sviðum, og þema vetrarins er „Sterkari þú“. Allir viðburðir starfsársins munu vinna með þemað, en stefnt er að fjölda fyrirlesara, námskeiða og fleiru skemmtilegu tengdu efninu.
