Norski olíusjóðurinn, stærsti þjóðarsjóður heims með eignir sem nema um 1.900 milljörðum bandaríkjadala, hvetur Evrópusambandið til þess að ráðast þegar í stað í víðtækar umbætur á fjármálakerfi álfunnar.
Markmiðið er að efla samkeppnishæfni Evrópu á alþjóðavísu og koma í veg fyrir að álfan dragist enn frekar aftur úr Bandaríkjunum og Asíu.
Sjóðurinn á að meðaltali 2,5 prósenta hlut í hverju skráðu félagi í Evrópu og gegnir þar með veigamiklu hlutverki á evrópskum fjármálamörkuðum.
Þrátt fyrir það hefur hlutfall evrópskra hlutabréfa í eignasafni sjóðsins lækkað úr 26 prósentum í 15 prósent á síðustu tíu árum. Sjóðurinn rekur þessa þróun einkum til versnandi samkeppnisskilyrða í Evrópu samanborið við bandaríska og asíska markaði.
„Vel starfandi fjármálamarkaðir í Evrópu skipta okkur miklu máli. Það ríkir nú ákveðin aðkallandi áhersla á umbætur meðal stjórnvalda, sem við fögnum – og finnum sjálf fyrir,“ segir Malin Norberg, framkvæmdastjóri markaðsstefnu hjá norska þjóðarsjóðnum, í viðtali við Financial Times.
Sjóðurinn hyggst á næstunni skila formlegri umsögn til framkvæmdastjórnar Evrópusambandsins vegna samráðs um samþættingu fjármálamarkaða.
Þar eru settar fram kröfur um að stefnan verði metnaðarfyllri og taki á djúpstæðum, kerfislægum hindrunum sem hafi hamlandi áhrif á markaðsvöxt.
„Við deilum þeim áhyggjum að evrópskir fjármálamarkaðir hafi smám saman tapað getu til að skapa kraftmikla viðskiptastarfsemi og spennandi fjárfestingartækifæri fyrir fagfjárfesta,“ segir í umsögninni.
Sjóðurinn nefnir sérstaklega mikinn breytileika í lögum aðildarríkjanna um verðbréfaviðskipti, félagarekstur og gjaldþrot sem stórar hindranir í vegi markaðsþróunar.
Þá er lögð áhersla á samræmingu skattkerfa, einkum hvað varðar staðgreiðslu arðs og einföldun á útgáfu skuldabréfa yfir landamæri.
Auk þess telur sjóðurinn mikilvægt að auka seljanleika evrópskra hlutabréfa með samkeppni og nýsköpun fremur en með auknu regluverki, og að eftirlit með fjármálastarfsemi verði sameinað á evrópskum vettvangi.
Þótt norsk stjórnvöld hafi árið 2012 ákveðið að draga úr vægi Evrópu í fjárfestingarstefnu sjóðsins halda stjórnendur hans því fram að rót vandans sé fyrst og fremst kerfislæg.
Fjöldi evrópskra skráðra félaga sem sjóðurinn hefur getað fjárfest í hefur farið minnkandi og vægi evrópskra eigna í eignasafninu sömuleiðis.
Á sama tíma hefur hlutdeild bandarískra hlutabréfa aukist verulega og stendur nú undir 40 prósentum af heildareignum sjóðsins, samanborið við 21 prósent fyrir áratug.
„Við höfum orðið var við að fjöldi skráðra evrópskra fyrirtækja sem við getum fjárfest í hefur dregist saman og það hefur haft bein áhrif á umfang okkar í álfunni,“ segir Emil Framnes, yfirmaður hlutabréfaviðskipta hjá sjóðnum.
