Nova orðið minnsta félagið í Kauphöllinni

Fjarskiptafélagið Nova er orðið minnsta félagið á aðalmarkaði Kauphallarinnar, sé miðað við markaðsvirði, eftir 6,6% hækkun á hlutabréfaverði Sýnar í dag.

Nova var skráð í Kauphöllina þann 21. júní síðastliðinn að undangengnu almennu hlutabréfaútboði í byrjun síðasta mánaðar. Gengið í útboðinu var 5,11 krónur en hefur síðan lækkað um 15,7% og stóð í 4,31 krónu við lokun markaða í dag. Markaðsvirði Nova nemur 16,5 milljörðum króna samanborið við 19,5 milljörðum í útboðinu.

Sýn hefur verið minnsta félag aðalmarkaðarins en markaðsverð hlutabréfa félagsins hækkaði um 11% í vikunni, ekki síst vegna fjárfestingar nýstofnaða fjárfestingafélagsins Gavia Invest sem er orðið stærsti hluthafi Sýnar með 16,1% hlut. Markaðsvirði Sýnar nemur nú 17,4 milljörðum.

Næstu félögin þar fyrir ofan eru Iceland Seafood International, Origo og Ölgerðin. Stærstu félög aðalmarkaðarins eru hins vegar Marel sem er 466 milljarðar að markaðsvirði, Arion með 265 milljarða markaðsvirði og Íslandsbanki með 256 milljarða markaðsvirði.

Útgerðarfélögin Síldarvinnslan og Brim eru svo fjórðu og fimmtu stærstu félög aðalmarkaðarins.