Heimsmarkaðsverð á olíu hefur lækkað um tæp 6% í morgun en samkvæmt Financial Times má rekja lækkunina til ákvörðunar Ísrael að hörfa frá því að gera árás á olíuhreinsunarstöðvar Íran.
Tunnan af Brent-hráolíu, sem er meðal annars notuð í eldsneyti, stendur í 71,6 dölum um þessar mundir en var í kringum 76 dölum rétt fyrir helgi.
Vestur-Texas-fatið féll um 4,4% í morgun og stendur í um 68,63 dölum.
Samkvæmt FT spila ummæli Ayatollah Ali Khamenei, æðsta klerks Íran, einnig inn í lækkunina en hann þótti fremur hófstilltur eftir árás Ísrael.
Khamenei hótaði engum beinum hefndaraðgerðum og hafa fjárfestar á hrávörumarkaði tekið því sem svo að ástandið sé að róast um stund.
Samkvæmt greiningardeild Goldman Sachs eru fjárfestar hægt og rólega að hafa meiri áhyggjur af offramleiðslu á olíu á næsta ári fremur en átökum í Mið-Austurlöndunum.
