Frá árinu 2020 hefur raforkukostnaður heimila á föstu verðlagi hækkað um tæplega 11%, sem samsvarar um 2,4% árlegri hækkun umfram verðbólgu þróun.
Þetta kemur fram skýrslu sem Umhverfis- og orkustofnun hefur unnið um þróun raforkukostnaðar og áhrifum verðþróunar á notendur.
Raforkukostnaður hjá fyrirtækjum, sem nota umtalsvert magn raforku (á bilinu 2-20 GWh á ári), hefur hækkað um 8% á föstu verðlagi yfir sama tímabil og er það nærri 2% árleg hækkun.
Þá hefur smásöluverð raforku á árunum 2020-2025 hækkað um rúm 4% á föstu verðlagi. Í skýrslunni er bent á að smásöluverð lækkað um 10% á föstu verðlagi frá árinu 2005 til 2020.
Flutningskostnaður hækkað um 20%
Flutningskostnaður almennra notenda hefur hækkað um rúmlega 20% frá árinu 2020-2025 á föstu verðlagi, eða um rúmlega 60% á breytilegu verðlagi.
Flutningsgjald stórnotenda hefur hækkað um rúmlega 35% í Bandaríkjadölum talið frá 2020 til 2025 á föstu verðlagi. Fram kemur að raforkukostnaður dæmigerðs álvers hafi hækkað um 25% í dölum talið yfir sama tímabil.
„Dæmigerð EBITDA framlegð álvers hér á landi er nú 10-15% af tekjum. Neikvæð áhrif af hækkun raforkukostnaðar umfram breytingar í tekjum eru að alþjóðleg samkeppnishæfni fyrirtækja, sem nota mikið magn raforku og keppa við heimsmarkaðsverð, er skert.“
Álver, gagnaver og kísilver greiða heildsöluverð raforku og flutningsgjöld, en greiða ekki fyrir dreifingu og jöfnunargjald. Raforkuverð álvera er að mestu tengt við heimsmarkaðsverð áls í Bandaríkjadölum auk þess sem flutningsgjaldskráin til stórnotenda er í dölum.
Raforkukostnaður gagnavera hækkað um helming
Dæmigerður raforkukostnaður gagnavera hefur hækkað um 54% á föstu verðlagi yfir þetta fimm ára tímabil.
Í skýrslunni segir að dæmigerð EBITDA framlegð í rekstri gagnavera nemi um 50% og hafi hærri raforkukostnaður því haft lítil áhrif á rekstrarafkomu þeirra hingað til.
