Viðsnúningur hefur orðið á rekstri Rammagerðarinnar samkvæmt nýrri ársskýrslu félagsins var yfir 100 milljóna króna hagnaður eftir erfiðan rekstur síðustu ár af völdum kórónaveirunnar.
Í tilkynningu frá Rammagerðinni kemur fram að arður verður ekki greiddur út í ár heldur notaður í áframhaldandi uppbyggingu félagsins.
„Viðspyrna Rammagerðarinnar ehf. hófst á árinu 2021, verslanir voru endur-opnaðar, nýjar verslanir opnaðar og félagið bætti við sig starfsfólki eftir uppsagnir á árinu 2020. Á árinu 2022 var áhersla lögð á að styrkja innviði félagsins með góðum árangri. Rammagerðina sækir heim mikill fjöldi erlendra gesta sem og Íslendinga,“ segir í tilkynningunni.
„Við erum að byggja upp félagið til vaxtar“
Þar segir einnig að stjórn félagsins líti björtum augum á komandi ár og telur félagið vel undirbúið fyrir áframhaldandi vöxt.
Rammagerðin á sér langa verslunarsögu í miðborg Reykjavíkur og í sumar tók Rammagerðin húsnæði á Laugavegi 31 (áður Kirkjuhúsið) á leigu undir nýtt flaggskip verslunarkeðjunnar.
„Verslunin mun opna fyrir jól og verður glæsilegur vettvangur fyrir þann hönnunarheim sem Rammagerðin býður upp á og bætist við verslanir Rammagerðarinnar í Reykjavík sem eru á Skólavörðustíg og í Hörpu. Rammagerðin er stolt af því að vera eina fyrirtækið á Íslandi sem vinnur alfarið með íslenskum hönnuðum og framleiðendum,“ segir í tilkynningu.
Þá mun ný verslun Rammagerðarinnar opna á Keflavíkurflugvelli á nýju ári en hún er unnin af Basalt arkitektum líkt og verslanirnar í Hörpu og á Laugavegi.
„Við erum að byggja fyrirtækið upp aftur eftir erfið ár í Covid. Við erum svo glöð að reksturinn hafi verið jákvæður þrátt fyrir það. Vegferðin er skýr: Við erum að byggja upp félagið til vaxtar, fjárfesta í nýjum búðum og vörum sem og fólki. Til þess að geta það þarf grunnreksturinn að vera góður,“ segir Bjarney Harðardóttir, annar eiganda Rammagerðarinnar.
