Lögmenn stjórnenda og skiptastjórar þrotabús WOW air höfðu komið sér saman um að málflutningur föstudagsins, í tengslum við greiðslur WOW air til Eurocontrol skömmu fyrir þrot, yrði leiðarvísir fyrir sambærileg mál næstu vikurnar en reikna má með að aðalmeðferð verði lokið í byrjun nóvember. Eurocontrol er milliríkjastofnun sem styður við flug og flugleiðsögu í Evrópu.
WOW air greiddi 540 þúsund evru reikning sem var kominn yfir gjalddaga í marsmánuði 2019. Þrotabúið heldur því fram að milliríkjastofnunin hafi verið grandvís um stöðu WOW air, þrýst á greiðsluna og að stjórnendur félagsins væru skaðabótaskyldir með því að hafa þrýst á að hún yrði innt af hendi.
Lögmaður Eurocontrol, lögmaður Skúla Mogensen, stofnanda og forstjóra WOW air, sem og lögmaður annarra stjórnenda, höfnuðu þessum málatilbúnaði alfarið fyrir dómi á föstudaginn. Þórir Júlíusson, lögmaður Eurocontrol, krafðist frávísunar fyrir hönd Eurocontrol í þriðja sinn en tveir úrskurðir hafa þegar tekið á frávísunarkröfum Eurocontrol.
Þrátt fyrir að frávísunarkröfunni hafi verið hafnað í tvígang sagði Þórir að eftir vitnaleiðslur vikunnar og málflutning stefnenda (þrotabú WOW air) væri tilefni til að endurskoða fyrri ákvörðun um frávísun eftir aðalmeðferð, líkt og heimilt er í lögum um meðferð einkamála.
Þórir sagði málatilbúnað þrotabúsins hafa tekið þó nokkrum breytingum síðastliðið ár en upphaflega hafi verið um venjulegt riftunarmál að ræða.
Þrotabúið hélt því fram að grandsemi Eurocontrol um stöðu WOW air hefði verið „augljós“ og milliríkjastofnunin hefði „haft í hótunum“ við flugfélagið um að fá greiðsluna og að Skúli Mogensen hefði tekið persónulega ábyrgð á að inna greiðsluna af hendi þar sem hann vissi að vanskil við Eurocontrol fælu í sér vanefndir á samningum við leigusala.
„Með stefnunni voru ekki lögð fram nokkur gögn sem vörpuðu ljósi á meint tjón stefnanda [þrotabú WOW ai]),“ sagði Þórir fyrir dómi og bætti við að það virðist á því byggt að Skúli hefði átt að gefa félagið upp til gjaldþrotaskipta löngu fyrir greiðsluna „á ótilgreindum tímapunkti“.
Í kjölfarið var öðrum fyrrverandi stjórnarmönnum WOW air stefnt inn í málið og á því byggt að ekki hafi verið hægt að afmarka ákvarðanatöku um þessa greiðslu til Eurocontrol.
Hægt er að lesa ítarlegri umfjöllun Viðskiptablaðsins um málflutning í máli þrotabús WOW air gegn stjórnendum hér.