Samhentir Kassagerð hefur náð samkomulagi um kaup á Formar ehf. en hið síðarnefnda er nýtt félag sem var stofnað utan um reksturinn á frauðplastdeild Borgarplasts að Ásbrú í Reykjanesbæ eftir söluna á hverfisteypuverksmiðju til Umbúðamiðlunar. Viðskiptin eru nú til meðferðar hjá Samkeppniseftirlitinu.
Umbreyting, framtakssjóður í rekstri Alfa Framtaks, keypti Borgarplast og Plastgerð Suðurnesja árið 2018.
Um hálfs milljarðs velta
Á heimasíðu Borgarplast er greint frá því að síðasta sumar urðu breytingar á eignarhaldinu eftir að Umbúðamiðlun keypti hverfisteypuverksmiðjuna ásamt nafninu Borgarplast.
Frauðplastdeildin varð eftir í eigu framtakssjóðs Alfa Framtaks og var nafninu breytt í Formar ehf.
Kaupverðið er ekki gefið upp í viðskiptunum en samkvæmt heimildum Viðskiptablaðsins var velta Formars ehf. um 500 milljónir í fyrra. Hið nýstofnaða félag á enn eftir að skila fyrsta ársreikningi.
Samhentir veltu 6,8 milljörðum árið 2022
Samhentir Kassagerð hagnaðist um 431 milljón króna árið 2022 eftir að hafa hagnast um 339 milljónir árið áður.
Rekstrartekjur námu 6,8 milljörðum og jukust um 11% milli ára.
Í skýrslu stjórnar í ársreikningi segir að reksturinn hafi gengið vel og í samræmi við áætlanir. Bent er á að EBITDA hafi batnað um 202 milljónir milli ára.
