Peningastefnunefnd Seðlabanka Íslands ákvað í byrjun mánaðarins að hækka stýrivexti um 0,25 prósentustig, úr 5,5% í 5,75%. Í fundargerð nefndarinnar, sem var birt í dag, kemur fram að allir nefndarmenn studdu tillögu Ásgeirs Jónssonar um 25 punkta hækkun.
Nefndarmenn töldu að bæði væru rök fyrir að halda meginvöxtum óbreyttum eða hækka þá um 0,25-0,5 prósentur.
„Nefndarmenn voru sammála um að skýrari vísbendingar hefðu komið fram milli funda um að vaxtahækkanir undanfarin misseri hefðu hægt á vexti almennrar eftirspurnar og umsvifum á húsnæðismarkaði,“ segir í fundargerðinni.
Hins vegar hafi undirliggjandi verðbólga aukist á milli funda „sem gæti bent til þess að verðbólguþrýstingur væri enn vanmetinn“. Vísbendingar séu um að verðbólguvæntingar séu farnar að lækka á ný en eru enn yfir verðbólgumarkmiði bankans.
Jón Bjarki Bentsson, aðalhagfræðingur Íslandsbanka, þótti áhugavert að peningastefnunefndin hafi rætt um að halda vöxtum óbreyttum. Í kjölfar vaxtaákvörðunarinnar sagði Greining Íslandsbanka, sem Jón Bjarki fer fyrir, að hún teldi líklegt að vaxtahækkunarferli Seðlabankans væri nú lokið, „að minnsta kosti í bili“.
Samhljómur var í peningastefnunefnd Seðlabankans um að hækka vexti um 0,25 prósentur fyrir hálfum mánuði. Athygli vekur að óbreyttir stýrivextir voru einnig ræddir, sem og reyndar 0,50 prósenta hækkun.https://t.co/Qf8POBADBm
— Jón Bjarki (@JBentsson) October 19, 2022
