Guðmundur Ragnarsson, lífeyrisþeg, ráðgjafi um lífeyrismál hjá GR Ráðgjöf og fyrrum formaður VM, fer ófögrum orðum um skattahækkunarloforð Samfylkingarinnar í aðsendri grein á Vísi.
Líkt og Viðskiptablaðið greindi frá stefnir Samfylkingin á að hækka fjármagnstekjuskatt úr 22% í 25%.
Í grein sinni bendir Guðmundur á að samkvæmt hagspá Arion banka séu innlán heimilanna sögð vera um 1.600 milljarðar króna.
„Með því að taka frá innlán vegna viðbótarlífeyrissparnaðar, orlofsreikninga og veltiinnlán þá reiknast mér til að um 1.200 milljarðar eru innlán heimilanna í bankakerfinu sem bera fjármagnstekjuskatt. Við að skoða þessar tölur kom upp í huga mér hin síendurtekna umræða um þessa vondu fjármagnseigendur og þá eigi að skattleggja eins og hægt er,“ skrifar Guðmundur.
Guðmundur segir að boðskapur Samfylkingarinnar sé að þeir fjármunir sem eiga að fjármagna þá miklu samfélagsbyltingu sem þeir boða, eigi að stórum hluta að fjármagna með hækkun á fjármagnstekjuskatti.
„Þá fór ég að velta því fyrir mér hvort ekki þurfi að fara að skilgreina það betur hvað er eðlilegur sparnaður almennings sem búið er að greiða af tekjuskatt eða einstaklingar fengið í arf, auk annars sem hefur búið til þennan sparnað heimilanna.
Ef heimilin eiga að vera vondi kallinn og fjármagna loforðapakka Samfylkingarinnar þá er verið að framkalla miklar blekkingar ef fjármunirnir eiga að koma frá sparnaði almennings með eignaupptöku,“ skrifar Guðmundur.
Viðreisn að fórna öllu til að komast í ríkisstjórn
Í grein sinni bendir Guðmundur á að í heilbrigðu hagkerfi með stöðuleika er eðlilegt að sparnaður haldi verðgildi sínu og eðlilega ætti eingöngu að leggja fjármagnstekjuskattinn á raunávöxtunina.
„Með 22,5% fjármagnstekjuskatti af verðtryggingu með litla eða enga raunávöxtun er í raun verið að taka fjármuni almennings eignarnámi, það næst ekki að halda í raunvirði fjármunanna. Það er ótrúlegt að þessi eignaupptaka á sparaði heimilanna hafi fengið að viðgangast. Með öðrum orðum er verið að refsa fólki fyrir það að sýna ráðdeild og spara.“
Að mati Guðmundar verður að skilgreina þennan sparnað sem slíkan og hann á að meðhöndla öðruvísi en fjármuni sem koma úr öðru.
„Það þarf að skilgreina hina réttu fjármagnseigendur öðruvísi og skattleggja þá með þrepaskiptum fjármagnstekjuskatti. Margir af þessum fjármagnseigendum borga ekki útsvar fyrir þjónustu sveitarfélagsins,” skrifar Guðmundur en viðurkennir fúslega það sé erfitt að eyrnamerkja þessa fjármuni.
„Ætlar Samfylkingin að hækka skatta á sparnað heimila og einstaklinga þar sem ekki hefur verið hægt að halda í raunvirði þeirra eftir fjármagnstekjuskatta með núverandi skattaprósentu?
Á virkilega að fjármagna draumaland Samfylkingarinnar með eignaupptöku hjá almenningi?
Þeir flokkar sem eru að fórna öllu eins og Viðreisn til að komast í ríkistjórn verða að svara því hvort svona skattlagning á sparnað almennings verði samþykkt fyrir ráðherrastóla?“ skrifar Guðmundur.
Hann spyr í grein sinni hvort Samfylking hafi ekki áttað sig á hvaða afleiðingar þetta getur haft?
Hægt er að lesa grein Guðmundar hér.
