Hildur Sverrisdóttir, þingflokksformaður Sjálfstæðisflokksins, segir ummæli Jóhanns Páls Jóhannssonar þingmanns Samfylkingarinnar um að ríkisstjórnarsamstarfið sé gangandi vegna styrkja til stjórnmálaflokka standast enga skoðun.
Hildur Sverrisdóttir, þingflokksformaður Sjálfstæðisflokksins, segir ummæli Jóhanns Páls Jóhannssonar þingmanns Samfylkingarinnar um að ríkisstjórnarsamstarfið sé gangandi vegna styrkja til stjórnmálaflokka standast enga skoðun.
„Í ræðustól Alþingis á dögunum stóð Jóhann Páll Jóhannsson, þingmaður Samfylkingarinnar, og hélt því blákalt fram að ríkisstjórnarflokkarnir héldu samstarfi sínu gangandi einvörðungu til að tryggja sér háa styrki úr vösum skattgreiðenda, sem koma til greiðslu í janúar. Góðar samsæriskenningar geta verið safaríkar og spennandi en verra er þegar þær standast ekki minnstu skoðun,” skrifar Hildur í aðsendri grein á Vísi.
Hún segir engan þurfa að leita langt eftir afstöðu Sjálfstæðisflokksins til ríkisstyrkja til stjórnmálaflokka en flokkurinn hefur lengi talað fyrir breytingum á fjármögnun stjórnmálaflokka, þar á meðal algjöru afnámi opinberra styrkja.
Á síðasta landsfundi Sjálfstæðisflokksins ályktaði fundurinn að afnema skyldi opinbera styrki til stjórnmálaflokka og hækka hámarksframlag annarra aðila í staðinn. Þessari ályktun hafa þingmenn flokksins fylgt eftir í verki.
Diljá Mist Einarsdóttir þingmaður Sjálfstæðisflokksins hefur t.a.m. ítrekað lagt fram frumvarp sem miðar að því að draga úr opinberum styrkjum til stjórnmálaflokka og auðvelda þeim sjálfstæða tekjuöflun.
Í því frumvarpi er einnig lagt til að þröskuldurinn til að hljóta framlag frá hinu opinbera skuli hækkaður úr 2,5% í 4% atkvæðamagn.
Þetta tryggir að flokkarnir verði áfram bundnir af skýrum reglum um gagnsæi og framlög frá óþekktum aðilum verða áfram bönnuð.
„Hugarórar um að ríkisstjórnarsamstarfið byggi á von um fjárframlög eiga sér væntanlega rætur í pólitískum ásetningi fremur en því að þingmaðurinn trúi þessu sjálfur. Sú heimsmynd að flokkarnir sem stýra landinu geri það í þeim eina tilgangi að fá fjárgreiðslur frá ríkinu er dökk og hryggileg. Það vona ég innilega og trúi ekki að nokkur flokkur vinni út frá slíkri hugmyndafræði,“ skrifar Hildur
„Stjórnmálaflokkar eiga að hafa möguleika á að axla ábyrgð á eigin fjármálum með sjálfstæðri fjármögnun, án þess að styrkir frá ríkinu séu þeirra helstu tekjulind. Opinber fjárframlög eiga ekki og ættu ekki að vera stjórnmálaflokkum haldreipi, öllu heldur þarf að hvetja til aukinnar ábyrgðar og gegnsæis.
Eitt er allavega víst, Sjálfstæðisflokkurinn óttast ekki kosningar, nú sem endranær, hvenær sem þær kunna að verða haldnar,“ skrifar Hildur að lokum.
