Líkt og Viðskiptablaðið sagði frá í vikunni er von á endanlegri niðurstöðu hjá embætti Héraðssaksóknara á næstu vikum um hvort ákært verði í Skeljungsmálinu svokallaða. Málið hefur verið til meðferðar hjá embættinu frá árinu 2016 og lauk rannsókn þess síðla árs 2021.
Sumarið 2018 dró til tíðinda þegar greint var frá því að ráðist hefði verið í húsleitir og þau Svanhildur Nanna Vigfúsdóttir og Guðmundur Örn Þórðarson handtekin vegna málsins. Þeim var sleppt samdægurs.
Auk þeirra fengu Einar Örn Ólafsson, Halla Sigrún Hjartardóttir og Kári Þór Guðjónsson réttarstöðu grunaðs manns við rannsókn málsins. Viðskiptablaðið greindi frá því árið 2020 að einn einstaklingur til viðbótar hefði bæst í hóp þeirra sem hafa réttarstöðu grunaðs en ekki hefur fengist upplýst hver sá sjötti er.
Viðskiptin með Skeljung og Magn
Rannsókn málsins lýtur að sölu Glitnis á 51% hlut í Skeljungi í ágúst 2008 til BG Partners, félags í eigu Birgis Bieltvedt auk Svanhildar Nönnu og Guðmundar Arnar. Greitt var fyrir hlutinn að hluta með lánsfé frá Glitni. Hluturinn var síðar meir færður í félagið Skel Investments.
Vorið 2009 var Einar Örn Ólafsson ráðinn forstjóri Skeljungs en hann hafði komið að söluferli félagsins sem starfsmaður fyrirtækjaráðgjafar Glitnis. Einar Örn var ráðinn af þáverandi meirihlutaeigendum en honum hafði nokkrum vikum áður verið vikið frá störfum sem framkvæmdastjóra fyrirtækjaráðgjafarinnar og vísaði bankinn til trúnaðarbrests.
Í september 2009 setti Íslandsbanki eftirstandandi 49% hlut sinn í söluferli og í byrjun næsta árs keypti félag í eigu Svanhildar Nönnu, Guðmundar og Birgis hlutinn. Verðið á hlut var lægra en í fyrri viðskiptunum. Birgir seldi hlut sinn árið 2011.
Um svipað leyti og Einar Örn settist í forstjórastól Skeljungs keypti eignarhaldsfélagið Hedda, í eigu Svanhildar Nönnu og Guðmundar, færeyska olíufélagið P/f Magn út úr þrotabúi Fons. Kaupverðið var um 300 milljónir króna.
Um tveimur árum síðar, það er árið 2011, keyptu Halla Sigrún Hjartardóttir, fyrrnefndur Einar Örn og Kári Þór 66 prósent hlut í Heddu. Þeim hlut skiptu þau bróðurlega á milli sín en hvert og eitt þeirra greiddi 24 milljónir króna fyrir hlutinn. Öll þrjú höfðu starfað í fyrirtækjaráðgjöf Glitnis þegar Svanhildur Nanna og Guðmundur Örn eignuðust Skeljung. Ekki hefur fengist á hreint hví þeim bauðst að kaupa hlutinn á þeim kjörum.
Vorið 2013 var greint frá því að Skeljungur væri til sölu og hið sama gilti um P/f Magn. Undir lok ársins voru félögin tvö seld til sjóðs í stýringu hjá Stefni. Samanlagt kaupverð var í kringum átta milljarðar króna sem skiptist svo til helminga milli félaganna tveggja.
Í söluferlinu vaknaði grunur meðal þeirra sem fengu aðgang að gagnaherbergjum um að við söluna á Skeljungi hefði verið samið við þremenningana í fyrirtækjaráðgjöfinni um að þau myndu eignast hlut í færeyska olíufélaginu. Söluverð þess hluta er var í þeirra eigu var um 2,6 milljarðar króna. Hagnaður hvers og eins þeirra var því ríflega 830 milljónir króna.
Töldu sig hafa orðið af hátt í milljarði
Í árslok 2013 tók Íslandsbanki yfir Skel Investments á grunni þeirra veða sem bankinn hafði í eigum félagsins. Í byrjun næsta árs var félagið sett í þrot og réðst skiptastjóri þrotabúsins í rannsókn á málum er lutu að starfsemi þess fyrir gjaldþrot. Sú rannsókn leiddi til kæru til embættis Héraðssaksóknara sem send var af bankanum.
Taldi bankinn meðal annars að eigendur Skel Investments, þau Svanhildur Nanna og Guðmundur Örn, hefðu þynnt út eignarhlut félagsins í Skeljungi með þeim afleiðingum að bankinn hefði orðið af hátt í milljarð króna.
Fréttin er hluti af lengri umfjöllun um Skeljungsmálið í nýjasta tölublaði Viðskiptablaðsins sem kom út í gær.
