Hagstofa Íslands spáir því að verðbólga muni hjaðna áfram á næstu árum og verði að meðaltali 2,7% en að hún nái verðbólgumarkmiði Seðlabanka Íslands árið 2027.
Þetta kemur fram í nýbirtri þjóðhagsspá Hagstofunnar en þar segir að húsnæði hefur verið megindrifkraftur verðbólgu síðustu ár en án húsnæðis hækkaði vísitala neysluverðs um 2,8% í október frá síðasta ári.
„Hagkerfið hefur kólnað og þó að stýrivextir hafi lækkað um 25 punkta í október er aðhald peningastefnunnar enn mikið. Þá hefur gengi krónunnar styrkst á síðustu mánuðum, verðbólga erlendis hjaðnað og olíuverð á heimsmörkuðum lækkað. Hóflegir kjarasamningar til lengri tíma styðja einnig við hjöðnun verðbólgu. Útlit er fyrir að vísitala neysluverðs hækki að meðaltali um 5,9% á þessu ári og um 3,8% árið 2025,” segir í spánni.
Hagstofan telur enn ríkja óvissu um áhrif útfærslu á breyttu fyrirkomulagi á innheimtu veggjalda í vísitölunni í byrjun árs 2025 en áætlað er að afnám bensín- og olíugjalda lækki vísitölu neysluverðs en á móti er gert ráð fyrir að álagning kílómetragjalds vegi rúmlega á móti til hækkunar.
Í spá Hagstofunnar er gert ráð fyrir að verg landsframleiðsla aukist um 0,1% í ár.
Samkvæmt þjóðhagsreikningum dróst verg landsframleiðsla saman um 1,9% á fyrri hluta ársins sem einkenndist af neikvæðum áhrifum utanríkisviðskipta og birgðabreytinga, m.a. vegna loðnubrests.
„Mestur var samdrátturinn á fyrsta ársfjórðungi en reiknað er með hagvexti á seinni hluta ársins, þá er gert ráð fyrir viðsnúningi í utanríkisviðskiptum og hóflegum vexti einkaneyslu. Árið 2025 er spáð 2,4% hagvexti sem byggist á áframhaldandi vexti einkaneyslu og bata í utanríkisviðskiptum. Árið 2026 er hagvöxtur áætlaður 2,7% og að vöxturinn verði á breiðum grunni.“
Helstu óvissuþættir í spá Hagstofunnar eru: Náttúruhamfarir á Reykjanesi, verðbólguþróun., aukin spenna í alþjóðasamskiptum, stríðsátök og alþjóðlegar efnahagshorfur.
