Spá mikilli fækkun milljóna­mæringa í Bret­landi

Útlit er fyrir að fjöldi milljónamæringa í Bandaríkjadollurum sem hafa búsetu í Bretlandi og Hollandi muni fækka um fram til ársins 2028 samkvæmt nýrri skýrslu svissneska fjárfestingarbankans UBS.

Bankinn spáir því að fjöldi einstaklinga með auðæfi yfir eina milljón dollara muni aukast í 52 af þeim 56 löndum sem spáin nær til.

Einungis er spáð marktækri fækkun í Bretlandi og Hollandi, eða um 17% og 4% fækkun hjá hvoru landi um sig. Gangi það eftir þá mun fjöldi milljónamæringa í Bretlandi fækka úr 3.062 þúsund í 2.542 þúsund frá árinu 2023 til 2028.

Aðalhagfræðingur alþjóðlegrar eignastýringar hjá UBS segir í samtali við Financial Times að efnaðir einstaklingar sem hafi tök á sveigjanlegri búsetu hafi laðast að Bretlandi og Hollandi í mörg ár.

Nýleg þróun í heimshagkerfinu og alþjóðastjórnmálum hafi haft áhrif á ákveðinn hóp einstaklinga sem hefur leitað til þessara landa. Hann nefnir þar t.d. áhrif viðskiptaþvingana á rússneska auðkýfinga sem hafa margir haft búsetu í London.

Þess er einnig getið að Bretland hefur haft hlutfallslega marga milljónamæringa miðað við fjölda íbúa.

UBS spáir því að milljónamæringum muni fjölga mest í Taívan fram til ársins 2028 eða um 47% frá árinu 2023. Það skýrist helst af örum vexti örgjörvaiðnaðarins ásamt því að spáð er að fjölga muni efnuðum einstaklingum sem flytja til landsins.