Bandarísk fyrirtæki glíma við sívaxandi pappírsflóð og kostnaðarsamar úttektir eftir að stjórnvöld undir forystu Donalds Trump auka eftirlit með ráðningum erlendra starfsmanna.
Fyrirtæki eru beðin um að afhenda gögn innan þriggja daga eða sæta milljóna dómssektum, að því er fram kemur í frétt Financial Times.
Stjórn Trumps hefur á undanförnum mánuðum stóraukið úttektir á svokölluðum I-9 eyðublöðum, sem fyrirtæki þurfa að fylla út til að sýna fram á að starfsmenn þeirra séu löglega starfandi í Bandaríkjunum.
Þessar úttektir eru orðnar ein helsta leið Immigration and Customs Enforcement (ICE) til að finna mögulega ólöglega innflytjendur, án þess að fara í sýnilegar vinnustaðarannsóknir.
Smávægilegar villur í svokölluðum I-9 eyðublöðum, til dæmis að haka ekki við reit, geta kostað fyrirtæki þúsundir dollara í sektum fyrir hvern starfsmann.
Í apríl voru þrjú fyrirtæki í Denver dæmd til að greiða samtals yfir 8 milljónir dollara í sektir fyrir að hafa ráðið ólöglega innflytjendur.
Fyrr í sumar var framkvæmdastjóri fyrirtækis í San Diego dæmdur til skilorðsbundinnar refsingar vegna brota af þessu tagi.
„Þetta er orðinn algjör vítahringur,” segir John Mazzeo, lögfræðingur hjá Vertical Screen, sem sérhæfir sig í ráðningarskimun. Hann segir eftirspurn eftir þjónustu þeirra hafa náð sögulegu hámarki.
Þó að fjölmiðlar einblíni á áberandi aðgerðir ICE með lögregluáhrifum þá óttast stjórnendur fyrirtækja mest pappírsvinnuna og skyndiúttektirnar.
Úttektir eru nú stundum framkvæmdar í eigin persónu með óvæntum heimsóknum ICE á veitingastaði og fyrirtæki, í stað þess að sendar séu fyrirvaralausar tilkynningar í pósti.
Sérfræðingar telja að stjórnvöld beiti þessari aðferð í auknum mæli þar sem hún sé kostnaðarminni leið til að rekja upp net ólöglegra starfa og fella afleiðingar yfir atvinnurekendur í stað þess að einblína aðeins á útlendingana sjálfa.
ICE birti ekki reglubundnar upplýsingar um fjölda úttektarmála og fyrirtæki treysta því sífellt meira á óformleg tengslanet sín til að fá innsýn í umfang aðgerðanna.
„I-9 helvíti“ og flókin skráning
Skjalavinnsla vegna I-9 eyðublaða er orðin það flókin að bandarísk yfirvöld gefa út átta síðna leiðbeiningar til að útskýra hvernig eigi að fylla út fjögurra síðna skjalið.
Samkvæmt greiningu American Immigration Lawyers Association eru yfir 50 mögulegar samsetningar skjala sem starfsfólk getur lagt fram sem sönnun fyrir lögmæti ráðningar.
Á sama tíma hefur stjórnin vakið reiði fyrirtækja með því að afturkalla hluta af reglum frá stjórn Bidens, sem áður veittu vernd fyrir fólk frá óstöðugum ríkjum, eins og Haítí, sem nú gætu misst rétt sinn og þar með störf.
„Við komumst að því að talsverður fjöldi starfsmanna hjá okkur var með útrunnin heimildarskjöl og við neyddumst til að segja þeim upp,” segir framkvæmdastjóri tæknifyrirtækis í Atlanta, sem vildi ekki láta nafns síns getið.
