Í könnun sem Gallup gerði fyrir Viðskiptablaðið á dögunum voru landsmenn spurðir út í þekkingu og skoðun á veiðigjöldum en samkvæmt könnunni telur aðeins tæplega fjórðungur landsmanna sig vita hversu hátt hlutfall af hagnaði fiskveiða sé greitt í veiðigjald. Þá eru verulega skiptar skoðanir meðal landsmanna um hvað þeir telja að sé eðlilegt að greitt sé í veiðigjald.
Eins og staðan er í dag greiða sjávarútvegsfyrirtæki 33% af hagnaði fiskveiða í veiðigjald. Ríkisstjórnin stefnir aftur á móti á að koma í gegn frumvarpi sem mun tvöfalda skattheimtuna en sjálf hefur ríkisstjórnin talað um „leiðréttingu“.
Í könnun Gallup fyrir Viðskiptablaðið voru þátttakendur spurðir þriggja spurninga. Í fyrstu voru þátttakendur spurðir: Veist þú hversu hátt hlutfall af hagnaði fiskveiða er greitt í veiðigjald? Þá voru þeir annars vegar spurðir: Hversu hátt hlutfall af hagnaði fiskveiða telur þú að greitt sé í veiðigjald? Og hins vegar: Hversu hátt hlutfall af hagnaði fiskveiða finnst þér eðlilegt að greitt sé í veiðigjald?
Alls sögðust 22% vita hversu hátt hlutfall af hagnaði fiskveiða væri greitt í veiðigjald en 78% sögðust ekki vita það. Karlar svöruðu frekar játandi en konur, eða 31% á móti 13%. Þá var marktækur munur eftir fjölskyldutekjum, en 27-28% einstaklinga með hæstu tekjur og efri millitekjur svöruðu játandi á meðan hlutfallið var 17% hjá einstaklingum með lægstu tekjur og neðri millitekjur.
Svarhlutfallið var 93,3% en 168 svöruðu játandi og 595 neitandi. Athygli vekur að í seinni spurningunum tók aðeins helmingur svarenda afstöðu. Af þeim sem svöruðu fyrstu spurningunni játandi tóku 88% afstöðu til seinni spurningarinnar og 77% tóku afstöðu til þriðju spurningarinnar. Af þeim sem svöruðu fyrstu spurningunni neitandi tóku 43% afstöðu til seinni spurningarinnar og 44% tóku afstöðu til þriðju spurningarinnar.
Nánar er fjallað um málið í Viðskiptablaðinu, sem kemur út í fyrramálið. Áskrifendur geta nálgast fréttina í heild hér.
