Hæstiréttur felldi í síðustu viku fordæmisgefandi dóma sem víkka út ábyrgð endurskoðenda í tengslum við hlutafjáraukningar. Dómarnir marka tímamót en samkvæmt því sem Viðskiptablaðið kemst næst er um að ræða fyrsta sinn á Norðurlöndunum sem ábyrgð endurskoðenda nær til hlutafjáraukningar.
Fyrir rúmri viku síðan komst Hæstiréttur að þeirri niðurstöðu að endurskoðandinn Rögnvaldur Dofri Pétursson og BD30 ehf., áður endurskoðunar- og ráðgjafarfyrirtækið Ernst & Young ehf., þurfi að greiða þrotabúi Sameinaðs Sílikons rúmar 114 milljónir í skaðabætur auk vaxta, vegna sérfræðiskýrslu í tengslum við hlutafjárhækkun síðarnefnda félagsins í lok árs 2016.
Þrír aðrir dómar féllu sama dag sem lutu allir að aðkomu Rögnvaldar og Ernst & Young að málum Sameinaðs Sílkon en Rögnvaldur var sýknaður í tveimur þeirra og sýknaður „að svo stöddu“ í einu þeirra.
Hæstiréttur sló því föstu í öllum dómunum að þrotabúið væri rétti aðilinn til að krefjast bóta ef það teljist tjón þrotabúsins að hlutafé sé ekki greitt með réttum hætti og að endurskoðandi bæri ábyrgð á að staðfesta hlutafjáraukningar.
Rögnvaldur og E&Y voru þó einungis talin hafa sýnt af sér saknæma háttsemi í einu tilviki en rétturinn telur í öllum þremur dómunum að ábyrgðin sé til staðar. Til eru margir dómar hérlendis sem staðfesta skaðabótaábyrgð endurskoðanda á öðrum atvikum líkt og ársreikningagerð en þessi dómur markar tímamót um að ábyrgð endurskoðanda nái nú til þess að staðfesta hlutafjárhækkanir.
Áskrifendur geta lesið umfjöllun Viðskiptablaðsins um dómana fjóra og áhrif þeirra hér.
