Hlutabréfaverð Festi hefur hækkað um tæplega 16% á þremur viðskiptadögum frá því að félagið birti árshlutauppgjör þriðja ársfjórðungs á miðvikudaginn síðasta.
Dagslokagengi félagsins fyrir uppgjör eftir lokun markaða á miðvikudaginn var 230 krónur en gengið stendur í 266 krónum þegar þetta er skrifað. Samanlögð velta síðustu þrjá daga er tæplega þrír milljarðar.
Ásta S. Fjeldsted, forstjóri Festi, sagði í uppgjöri að rekstur félagsins á þriðja ársfjórðungi hafi gengið betur en áætlanir gerðu ráð fyrir.
Af þeim sökum hækkaði félagið EBITDA-spá sína fyrir árið um 400 milljónir króna.
Afkoma félagsins fyrir árið er nú áætluð á bilinu 12,7 til 13,1 milljarður króna.
Samkvæmt nýbirtu árshlutauppgjöri samstæðunnar nam vörusala félagsins 44,2 milljörðum króna og jókst um 6,9 milljarða eða 18,5% milli ára.
Nova birti einnig uppgjör í síðustu viku og hefur gengi félagsins hækkað um 6% á tveimur viðskiptadögum.
Hlutabréf í Nova taka við sér
Nova hagnaðist um 322 milljónir króna á þriðja ársfjórðungi samanborið við 266 milljónir á sama tímabili í fyrra. Hagnaðurinn á þriðja fjórðungi jókst um 20% milli ára.
Hlutabréfaverð Nova stóð í 3,82 krónum áður en uppgjörið birtist eftir lokun markaða á fimmtudaginn en dagslokagengið í dag var 4,04 krónur. Samsvarar það um 6% hækkun en gengið fór upp um 3,6% í viðskiptum dagsins.
Meira en milljarðs króna velta hefur verið með bréf Nova síðastliðna tvo viðskiptadaga.
Fjárfestingafélagið Skel leiddi lækkanir á markaði er gengi félagsins fór niður um tæp 3% í viðskiptum dagsins.
Hlutabréfaverð Skeljar hefur lækkað um 5,5% frá því að félagið tilkynnti að Samkaup, sem rekur verslanir Nettó, hefði ákveðið að slíta samrunaviðræðum við Samkaup og tiltekin félög í samstæðu Skeljar (Orkunnar, Löðurs og Heimkaupa).
Úrvalsvísitalan lækkaði um 0,17% í viðskiptum dagsins og var heildarvelta á markaði 6,3 milljarðar.
