Aukin á­hætta getur haft í för með sér meiri á­vöxtun og þannig hafa fjár­festar heilt yfir grætt meira á því að eiga hluta­bréf en skulda­bréf í gegnum tíðina. Á­vinningurinn af því að eiga hluta­bréf í stað skulda­bréfa hefur hins vegar farið minnkandi í ár og hefur bilið ekki verið minna í 20 ár, að því er segir í umfjöllun Wall Street Journal.

Greiningar­aðilar vestan­hafs óttast að þetta muni draga úr þátt­töku á hluta­bréfa­markaði á næstu misserum en allar helstu vísi­tölur hafa verið á mikilli upp­leið í ár.

Ein leið til að greina virði hluta­bréfa er að bera saman á­vöxtun bréfanna (með því að deila á­ætluðum hagnaði fyrir­tækis fyrir næsta ár með gengi bréfanna í dag) við á­vöxtunar­kröfu ríkis­skulda­bréfa.

Mis­munurinn þarna á milli sýnir fjár­festum þá auknu ávöxtun sem þeir geta fengið með því að eiga hluta­bréf fram yfir skuldabréf. Miðað við stöðuna í dag er munurinn heldur lítill.

Bilið milli á­vöxtunar á því að eiga bréf sem tilheyrir S&P 500 vísitölunni og 10 ára bandarísku ríkis­skulda­bréfi féll niður í 1,1% í síðustu viku. Hefur munurinn ekki verið minni síðan árið 2002.

Bilið byrjaði að minnka seinni hluta síðasta árs er á­vöxtunar­krafa ríkis­skulda­bréfa byrjaði að hækka í kjöl­far vaxta­hækkana seðla­bankans. Á þeim tíma byrjuðu hluta­bréf að ná jafn­vægi eftir að fjár­festar seldu mikið af bréfum í byrjun árs.

Í ár hefur á­vöxtunar­krafan ríkis­skulda­bréfa verið nokkuð stöðug á meðan hluta­bréfa­vísi­tölur hafa hækkað mikið. Fjár­festar vestan­hafs telja ó­tækt að bilið verði svona lítið til lengri tíma en það gerðist síðast þegar dot-com bólan sprakk undir lok tíunda ára­tugarins.