Fjármálaráðuneytið vinnur nú að heildarstefnumótun um skattlagningu ökutækja og eldsneytis. Markmiðið er að hvetja til notkunar vistvænna ökutækja, orkusparnaðar og minni losunar gróðurhúsalofttegunda frá samgöngum. Enn er fyrirhugað að hluti skattlagningar verði eyrnamerktktur samgönguframkvæmdum auk almennrar tekjuöflunar fyrir ríkissjóð, að því er fram kemur í Vefriti fjármálaráðuneytisins.
Ört vaxandi bílafloti
Bílafloti landsmanna hefur vaxið mjög að undanförnu. Í árslok 1990 voru skrásett ökutæki 134.000 en þau eru nú 292.000, sem er meira en tvöföldun. Enda þótt bílar nýti orku almennt betur en áður og akstur á hvert ökutæki hafi minnkað þá hefur heildarorkunotkunin aukist næstum því jafn mikið og fjölgun ökutækja. Í Vefritinu kemur fram að mat Vegagerðarinnar sé að losun koltvísýrings (og þar með annarra gróðurhúsalofttegunda) hafi aukist um 60% frá 1990 til 2006, eins og sýnt er á meðfylgjandi mynd. Orkunotkun hafi haldið áfram að aukast þótt það kunni að hafa dregið úr vaxtahraðanum. Fram kemur að Vegagerðin telji að losun díselbíla á fyrri hluta umrædds tímabils sé hugsanlega vanmetin.
Meiri aukning losunar frá samgöngum
Samkvæmt Kyoto-bókuninni við loftslagssamning Sameinuðu þjóðanna hefur Ísland heimild til að auka almenna losun gróðurhúsalofttegunda í heild um 10% frá 1990 til meðaltals áranna 2008-2012. Í nýlegri samþykkt ríkisstjórnarinnar um samningsmarkmið Íslands varðandi samdrátt í losun eftir 2012 kemur fram stuðningur við að iðnríkin dragi umtalsvert úr losun á næstu áratugum. Í Vefriti fjármálaráðuneytisins kemur fram að ljóst sé að aukin losun frá samgöngum hér á landi hafi verið mun meiri en önnur aukning og því sé mikilvægt að draga úr henni til að markmið um heildarlosun náist.
