Fulltrúarráð Sjálfstæðisflokksins í Reykjavík kom saman til fundar í Valhöll í gærkvöldi þar sem tillaga Varðar, stjórnar fulltrúarráðsins, um uppstillingu í Reykjavíkurkjördæmunum tveimur var samþykkt.
Tvo þriðju hluta fundarmanna þurfti til ef flokkurinn ætlaði ekki að halda prófkjör í Reykjavík.
Guðlaugur Þór Þórðarson, umhverfis-, orku- og loftslagsráðherra og oddviti Sjálfstæðisflokksins í Reykjavíkurkjördæmi norður í síðustu kosningum, og Áslaug Arna Sigurbjörnsdóttir, háskóla-, iðnaðar- og nýsköpunarráðherra og oddviti Sjálfstæðisflokksins í Reykjavíkurkjördæmi suður í síðustu kosningum, studdu bæði tillögu Varðar.
Stefnt á að listarnir liggi fyrir í næstu viku
Kjörnefnd var kosin á fundinum sem hefur það verkefni næstu daga að stilla upp á lista flokksins. Fulltrúaráð flokksins mun síðan koma saman að nýju og kjósa um listana.
Áslaug Arna segir í samtali við Viðskiptablaðið að stefnt sé að því að listarnir liggi fyrir í byrjun næstu viku.
„Það var stórt prófkjör í Reykjavík í síðustu kosningum og mikil þátttaka. Því var þetta talin besta leiðin núna til að hefja kosningabaráttuna sem fyrst,“ segir Áslaug Arna.
„Við erum að leggja lokahönd á undirbúning fyrir kosningabaráttuna. Við erum með sterka frambjóðendur en það er verk að vinna og við hlökkum til að taka samtalið við kjósendur,“ segir Áslaug Arna.
