Samkvæmt skýrslu peningastefnunefndar til Alþingis sem kom út í vikunni hefur verðbólguálag á skuldabréfamarkaði hækkað lítillega á fyrri hluta ársins.
Fimm ára álag eftir fimm ár var um 3,9% í lok júní en það var rúmlega 3,4% í lok síðasta árs.
Í skýrslunni sem Ásgeir Jónsson seðlabankastjóri skrifar, segir að langtímaverðbólguvæntingar hafi þróast á áþekkan hátt og hafa lækkað lítillega á flesta mælikvarða frá því í desember.
Samkvæmt maíkönnuninni væntu markaðsaðilar þess að verðbólga yrði að meðaltali 3,8% á næstu fimm árum og 3,5% á næstu tíu árum og höfðu væntingar þeirra til fimm ára lækkað frá því í desember en væntingar þeirra til tíu ára staðið í stað.
„Heimilin væntu þess í sumarkönnuninni að meðalverðbólga til fimm ára yrði 5% og höfðu væntingar þeirra lækkað frá vetrarkönnuninni í desember en stjórnendur fyrirtækja bjuggust við að hún yrði 4%,“ segir Ásgeir
Á maífundi peningastefnunefndar kom fram að áhrif vaxtahækkana síðasta árs héldu áfram að koma fram með skýrum hætti í efnahagslífinu.
„Hægt hefði á vexti innlendrar eftirspurnar þar sem peningalegt taumhald væri þétt og horfur væru á að það myndi áfram draga úr hagvexti í ár. Verðbólga hefði haldið áfram að hjaðna og verðbólguvæntingar lækkað á suma mælikvarða en væru enn yfir markmiði,“ skrifar Ásgeir.
