Talið er að miklar launahækkanir og minna atvinnuleysi muni meðal annars ýta undir hækkun stýrivaxta en samkvæmt nýjustu tölum bresku Hagstofunnar (ONS) hækkuðu laun um 7,2% frá febrúar til apríl samanborið við 6,8% frá janúar til mars. Fyrir utan tímabil í heimsfaraldrinum hefur hækkunin aldrei verið meiri. Þá dró úr atvinnuleysi en það mældist 3,8% á tímabilinu.

Tölurnar eru á skjön við væntingar markaðsaðila, sem bjuggust við að laun myndu aðeins hækka um 6,9% og atvinnuleysi aukast í 4%. Vinnumarkaðurinn virðist því ekki vera að kólna, samhliða því að verðbólgan hefur hjaðnað hægar en við var búist. Frekari vaxtahækkanir eru því taldar óumflýjanlegar.