Upplýsingatæknifyrirtækið Wise hefur undirritað samning um kaup á öllu hlutafé Þekkingar. Þetta kemur fram í tilkynningu frá Wise.
Wise hefur sérhæft sig í þróun, þjónustu og innleiðingu hugbúnaðarlausna á sviði viðskipta, á sama tíma og Þekking hefur sérhæft sig í rekstri og hýsingu á tölvukerfum fyrirtækja og stofnana.
„Með kaupunum verður til eitt af öflugri fyrirtækjum í upplýsingatækni á Íslandi með tæplega 200 starfsmenn á höfuðborgarsvæðinu og á Akureyri og yfir 4 milljarða sameiginlega veltu,“ segir í tilkynningu en kaupin eru háð fyrirvara um samþykki Samkeppniseftirlitsins.
Ólík kjarnastarfsemi
„Við sjáum gríðarleg tækifæri í því að sameina krafta Wise og Þekkingar. Kjarnastarfsemi fyrirtækjanna er ólík og með styrkleikum beggja getum við boðið viðskiptavinum Wise og Þekkingar mun sterkara og breiðara lausna- og þjónustuframboð,“ segir Jóhannes Helgi Guðjónsson, forstjóri Wise.
„Starfsfólk Þekkingar býr yfir mikilli reynslu og sérhæfingu sem fellur vel að vegferð Wise og við erum spennt fyrir því að taka þátt í framtíðar uppbyggingu félagsins,“segir Stefán Jóhannesson, framkvæmdastjóri Þekkingar.
