Húsnæðis- og mannvirkjastofnun bárust alls 145 umsóknir um hlutdeildarlán í október að andvirði 1,9 milljarða króna en einungis 800 milljónir eru til úthlutunar fyrir tímabilið. HMS segir að „liggi því sem næst fyrir að draga þurfi af handahófi úr umsóknum sem eru utan fyrsta forgangs.“
HMS opnaði fyrir umsóknir um hlutdeildarlán að nýju 4. október en hægt var að sækja um lánin til 21. október. Stofnunin stefnir að því að ljúka yfirferð innsendra umsókna í lok þessarar viku og mun svo ákvarða hverjar þeirra hljóta hlutdeildarlán.
Hlutdeildarlánin eru veitt til kaupa á nýjum íbúðum og standa þau til boða fyrir fyrstu kaupendur og þá sem ekki hafa átt íbúð síðastliðin fimm ár og eru undir tilteknum tekjumörkum.
Af þeim 145 umsóknum sem bárust um hlutdeildarlán í október voru 112 umsóknir með samþykktu kauptilboði og 33 umsóknir án kauptilboðs. Heildarfjárhæð umsókna í október var um 1.870 milljónir króna og þar af voru umsóknir með samþykktu kauptilboði samtals um 1.447 milljónir króna.
„Í forgangi eru umsóknir þar sem staðfest kauptilboð liggur fyrir, auk þess sem miða skal við að á hverju ári verði að minnsta kosti 20% veittra hlutdeildarlána veitt til kaupa á íbúðum utan höfuðborgarsvæðisins. Ekki verður hægt að gefa út lánsvilyrði fyrr en allar umsóknir hafa verið metnar,“ segir í tilkynningu HMS.