Málflutningur stjórnarliða í umræðunni um hækkun veiðigjalda virðist fyrst og fremst byggður á tilbrigðum við leiðaraskrif Þórðar Snæs Júlíussonar um sjávarútvegsmál í Heimildina og Kjarnann í gegnum tíðina.
Kristrún Frostadóttir forsætisráðherra kvað þannig kunnuglegt stef þegar hún sagði að hækkun veiðigjaldsins snerist fyrst og fremst um fjórar fjölskyldur og arðgreiðslur til þeirra. Hröfnunum finnst að stjórnmálamenn séu komnir á hálan ís þegar þeir eru farnir að tilgreina sérstaklega hvaða persónur eru skotmörk áforma um skattahækkanir.
Staðreynd málsins er jafnframt sú að lítil tengsl hafa reynst vera milli þess veruleika sem brugðið hefur verið upp í leiðurum Þórðar og efnahagslegra staðreynda. Arðgreiðlur hafa ekki verið meiri í sjávarútvegi en gengur og gerist og það er eðlilegt að vel rekin fyrirtæki greiða út arð.
Þrjú af stærstu sjávarútvegsfélögum landsins eru almenningshlutafélög skráð í Kauphöllina, og um þrjú þúsund manns starfa með beinum hætti við sjávarútveg – auk þess sem mun fleiri eiga mikinn hag af því að greinin sé arðbær og hafi svigrúm til fjárfestinga. Áform stjórnvalda um 70% raunskattlagningu greinarinnar munu hafa mikil áhrif á afkomu þessa fjölda.
Huginn og Muninn er einn af föstum ritstjórnardálkum VIðskiptablaðsins. Þessi pistill birtist fyrst í blaðinu sem kom út 25. júní 2025
