Í nútímasamfélagi hefur Spotify nánast orðið að samheiti yfir tónlist. Líkt og MTV á árum áður þá keppast hljómsveitir og tónlistarmenn við að koma efni sínu þar í streymi í von um að ná til milljóna mögulegra aðdáenda.
Kostnaðurinn við að reiða sig svona mikið á fyrirtækið er hins vegar mikill, bæði fyrir aðdáendur og tónlistarsenuna, og þá sérstaklega fyrir tónlistarmennina sem vonast til að fá greitt fyrir vinnuna sína.
Í bókinni Mood Machine útskýrir höfundurinn Liz Pelly þær leiðir sem Spotify hefur nýtt á undanförnum áratugum til að umbreyta tónlistarbransanum.
Spotify var stofnað árið 2006 í Stokkhólmi en á þeim var sænska höfuðborgin vinsæl fyrir ólöglegt niðurhal. Eini vinsæli markaðurinn fyrir stafræna tónlist var iTunes frá Apple en það myndi ekki bjóða upp á streymi fyrr en nokkrum árum eftir að Spotify kom til Bandaríkjanna.
Í dag er streymi langvinsælasta leiðin til að hlusta á tónlist og hefur markaðsvirði Spotify meira en tvöfaldast á síðasta ári í rúmlega 100 milljarða dala.
Höfundur mótmælir hins vegar því sem hún kallar gengisfellingu Spotify á tónlist og á tónlistarmönnum. Henni er alveg sama þótt Spotify græði pening, heldur vill hún sjá til þess að tónlistarfólkið nái að lifa af á tímum streymis og algóritma.
