Það er eitthvað ferskt yfir Peugeot E-208 bílnum sem ég fékk til reynsluaksturs nú á fyrstu dögum sumars. Kannski er það veðrið sem lék við landann þessa daga eða liturinn á bílnum. Allavega náði bíllinn að fanga athygli yngri sem eldri borgara sem urðu á vegi mínum og dáðust að litnum á bílnum sem og bílnum sjálfum. Svo var það spurningin um hvort bíllinn væri gulur eða grænn, en liturinn á Peugeot E-208 sem reynsluekinn var ber heitið Agueda gulur; frískandi avocado lime stemning nú í byrjun sumars.

Nýr framendi og nokkrar aðrar nýjungar

Peugeot E-208 er með nýjan framenda þar sem einkennandi skrautlýsing, sem á að tákna klær ljónsins sem er merki Peugeot, vekur strax athygli. Merkið hefur líka verið endurhannað og kemur vel út; óhætt að segja að þessar breytingar skili flottari bíl. Í GT útgáfunni er framendinn með sérstökum LED ljósum og grillið samlitað bílnum. Í boði eru þrjár útgáfur af E-208; Active, Allure og GT. Reynsluekinn var grunnmódelið, Active, sem kostar 5.990.000 kr. Þá á eftir að reikna styrk frá Orkusjóði sem gerir bílinn aðeins ódýrari.