James Bond, njósnari hennar hátignar, hefur ekið mörgum mögnuðum bílum í gegnum tíðina á hvíta tjaldinu. Margir þessir eðalvagnar hafa verið búnir ýmsum brellubúnaði sem er ómissandi hluti af atvinnutækjum njósnarans. Bílarnir og tækjabúnaður þeirra hefur oftar en ekki bjargað Bond í fjölmörgum ævintýrum njósnarans.
Af mörgum geggjuðum bílum úr myndunum um 007 er Aston Martin DB5 að öðrum ólöstuðum hinn eini sanni Bond bíll. Hann kemur fram í alls sex myndum um njósnara hennar hátignar. Þessi breski gullmoli var kynntur til sögunnar í Goldfinger 1964. Q, hinn magnaði tækjagúru bresku leyniþjónustunnar, var búinn að gera ýmislegt spennandi við bílinn. Meðal búnaðar í DB5 eru dekkjatætarar í felgumiðjunum, kampavínskælir í stokknum milli framsæta, vélbyssur, reyksprengjur og fleira, ásamt hinu ógleymanlega gormsæti sem gerir ökumanni kleift að losa sig í snarhasti við leiðinlega farþega í framsæti.
Á eftir Goldfinger kom DB5 fram í Thunderball 1965 og í Goldeneye 1995, en þá dustaði Pierce Brosnan blessunarlega rykið af honum eftir 20 ár í bílskúrnum. Í Goldeneye er Bond á DB5 í svakalegu bílaatriði í hæðunum yfir Mónakó ásamt hinni rússnesku Xeniu Onatopp á rauðum Ferrari F335 GTS. Bond er áfram á DB5 í næstu mynd, Tomorrow Never Dies, 1997.
Umfjöllunina um Bond og bílana hans er að finna í nýjasta tölublaði Eftir vinnu. Hér er greinin í heild.
