Listinn er eflaust langur hjá mörgum yfir það sem á eftir að gera á heimilinu fyrir jólin en við á Eftir vinnu mælum eindregið með því að fólk dimmi bara ljósin, kveiki á kertum og njóti þess að gæða sér á kræsingum heima fyrir með fólkinu sínu. Jólin koma alveg sama hvort það er búið að skúra eða ekki.
Fyrir þá sem leggja það í vana sinn að gera jólaísinn sjálfir þá er þessi uppskrift sem að rithöfundurinn Berglind Guðmundsdóttir deildi með lesendum sínum á heimasíðunni Gulur, rauður, grænn og salt á dögunum mögulega sú besta á netinu þessa dagana. Hún er bæði einföld og inniheldur hráefni sem að klikka seint. Berglind segist hafa orðið vör við það að fólk haldi að ísgerð sé flóknari en hún raunverulega er. Þessi einfalda og fljótlega uppskrift afsannar það hinsvegar.
„ Ég held að í heildina hafi tekið um 10 mínútur að útbúa þessa uppskrift sem veldur ávallt mikla lukku. Hér er Toblerone ísinn vinsæli gerður enn dásamlegri með piparkökukurli. Njótið! “
500 ml rjómi
4 egg
1 msk vanilludropar
hnífsoddur salt
8 msk flórsykur
150 g Toblerone
100 g piparkökur
- Þeytið egg og flórsykur vel saman þar til blandan er orðin létt og ljós.
- Bætið salti og vanilludropum saman við og hrært áfram.
- Saxið Toblerone súkkulaði og piparkökur í litla bita.
- Þeytið rjómann sér og blandið því öllu saman varlega með sleif.
- Setjið blönduna í form og í frysti.
Best er að gera ísinn kvöldinu áður.
